Shillong, Lber 13
U Myntri Rangbah ka Jylla, Conrad K Sangma u la ong ba ka suk ka saiñ ha ka Jylla ka long jai-jai bad kam don kano-kano ban khuslai, ha kaba u la ong ruh ba ka Sorkar kan long kaba peitngor ban pynneh ïa ka shong suk shnong saiñ.
“Ka jinglong-jingman ka long kaba lah ban teh lakam, lah ban don ki briew kiba pynmih ïa ki jingjia bad ïa kita ngi dang khmih bniah, nalor jong kane baroh ka long kaba jai-jai bad kaba ngi la teh lakam, ym donkam ban khuslai eiei”, la ong u Conrad haba kylli halor ka jingmih ki jingjia shah thang kali ha nongbah Shillong.
Lah ban kdew ba artylli ki kali ki la shah wiang ding ha ka por shiteng miet jong ka 12 tarik mynta u bnai ha ki briew bym lah satia ban tip. Kine ki jingjia ki dei kawei kaba la jia ha ka shnong Dongkadiang ha kaba kawei ka kali Sorkar kaba don ïa u nombar ML05 AB 1290 ka la shah wiang ding katba dang pynïeng harud surok ha katei ka thaiñ, katba kawei ka jingjia shah kawang petrol bom ka la jia ïa ka kali jong uwei u nongap ïa ka jaka shong ki ophisar ka NFR ‘Rest House’ kaba don ha Laban, bad ha katei ka jingjia ka kali ka la shu julor malu-mala.
Namar kine ki jingjia na ka liang ka tnat pulit ka la bthah bad ai jingmut ïa ki ophisar Sorkar ba kin da peit ïa ki kali haba ki pynïeng ha kino-kino ki jaka.
