Nongstoiñ, Lber 13
Kan dei lehse ka jingmyntoi ïa kiba bun balang khamtam ïa ki kmie ki kpa kiba la duh jingkyrmen ban plie lad ïa la ki khun ba la kha kyrpang ban ïoh lem ïa ki jinghikai kumba kiwei ki ïoh lem, ha kaba kawei ka longïing da i bor barit ka la mih shakhmat ban sdang ban plie ïa ka shlem ai jinghikai na ka bynta ki khynnah ba dang rit bad kumjuh ban ïarap kyrpang ïa kito ki khynnah kiba la kha kyrpang.
Kane ka skul ka dei kaba la seng da u Bah FK Nongrum bad Kong G Kharlyngdoh hapoh ka shnong Tiehsaw. La ai kyrteng ïa kane ka shlem da ka Brenda’s Playing Garden and Early Intervention Centre.
Ïa kane ka skul la jer kyrteng da kaba ai nam ha ka kyrteng jong i khun kynthei ba marwei ba la khlad noh i (L) Ornella Brenda Kharlyngdoh.
Shuh shuh ïa kane ka skul la plie paidbah ha ka sngi Palei da u Rev. B Ramsiej, uba dei u Missionary ka KJP Synod uba trei mynta ha Kathmandu, Nepal ha ryngkat ka jingïadonlang u Dr. R Marwein, Medical Officer na DMHO, u DCPO ka WKH Bah D Shabong, u Rev. LH Nongsiej, Tbn. CL Wanshong uba la pynïaid ïa ka jingïalang, Kong Delfi Lyngdoh, Special Educator na Mary Rice Centre, u Sordar ka shnong Tiehsaw Bah M Dkhar, u Bah Adoni Kharlyngdoh bad Berilin Jyrwa kiba dei ki nonghikai ha katei ka skul, ki kmie ki kpa bad kiwei kiwei.
U Rev B Ramsiej haba kren kum kongsan u la ong ba la plie ïa kane ka shlem ha ka lyngkhuh sngikha jong i (L) Ornella Brenda Kharlyngdoh bad kane ka sngi kam dei ba ngin jaw ummat hynrei ba ngin kmen namar ha kane ka sngi u la mih u soh bad kane ka dei ka jinglah jong kiba ha ïing ban plie ïa kane ka shlem hikai ba la ainam ha ka khun ba la khlad noh.
U Rev. B Ramsiej u la pule ruh katto katne ki dkhot na ka ktien jong U Blei bad u la ai mynsiem ruh ïa ki nonghikai bad kiba ha ïing ba kim dei ban kynran dien wat haba kin ïakynduh ïa kiba bun ki jingeh, hynrei ba kin ïaid shaphrang bad ba U Blei un don ryngkat bad btin lynti ïa ki ha kane ka jingshakri ïa u para briew, khamtam ïa kito ki khun kiba don hapdeng ka jingduh jingkyrmen.
U Bah Adoni Kharlyngdoh uba dei u khun jong katei ka ïing bad para jong i (L) Ornella Brenda, u la pynsngew ruh halor ka rukom ai jingshakri hapoh kane ka shlem ba kynthup ïa ka Playing Garden bad ka Intervention Centre.
