Shillong, Lber 13
Ka Federation of Khasi Jaiñtia and Garo People (FKJGP) Mawkynrew Circle hadien ba ïohpdiang ïa ki jingujor na ki trai ïing kiba shong bad sah ha Mawpyrshong kaba hap hapoh ka Mawkynrew Konstitwensi halor ka jingbuh jingma ka kynroh ba la mait ban shna surok, ka la kyrpad ïa ka ophis treikam jong ka PMGSY Road ba kan shimkhia lem halor kane ka kam namar kane kan buh jingma shikatdei eh ha ka por slap ba ju don ka jingtwa khyndew.
Ka seng haba ka leit ban jurip ïa katei ka jaka, kala pynpaw ïa ka jingsngewkhia kaba jur ban ïohi da la ki jong ki khmat da kaba kyrpad jur ïa ka ophis jong ka PMGSY Road ban shna kynroh noh ïa katei ka jaka bad lem ïa u Chief Engineer katei ka ophis treikam ban wan thew-wan woh noh ïa katei ka surok.
Ka seng ka la ong ruh ba katei ka ophis treikam ka dei ban wan thew bad woh biang sa shisien ïa katei ka kynroh ha katei ka jaka namar ha ka sien banyngkong ba u Chief Engineer bad ki nongtrei jong u, ki la wan ban thew ïa katei ka kynroh, ki la wan ha ka por ba ym shym la don satia ki briew ne ki seng ban batai.
“Ka seng ka la pynpaw ïa ka jingsngewkhia ban ïohi da la ki jong ki khmat bad ngi kyrpad jur ïa ka ophis PMGSY Road kaba hap hapoh ka Mawkynrew Block kaba donkti ban mait ïa kane ka kynroh hajan ka ïing jong ka Kong Philibon Mynsong ba kan shna noh ïa kane ka kynroh”, ong ka seng.
