Mynjur ka Ïingdorbar ïa ka Amendment Bill ka MSIPF hadien ba la pyndam ïa ka ‘Land Bank’

Shillong, Lber 13

Ka Ïingdorbar Thaw Aiñ jong ka Jylla ha ka sngi Palei ka la mynjur ïa ka Meghalaya State Investment Promotion Facilitation (Amendment) Bill, 2025, hadien ka rai jong ka Sorkar ban pyndam noh ïa ka kyntien pynkha ïa ki ‘land bank’ lyngba ka jingthied beit ïa ki jaka na ki trai lane na kiwei-kiwei ki lad.

Ïa kane ka Bill ba la wanrah da u Myntri Rangbah ka Jylla Conrad K Sangma la mynjur da ka jingkyrshan jong ki dkhot na baroh ka Liang Synshar bad Liang Pyrshah, kiba la pdiang bad ïaroh ïa ka jingkloi jong ka Sorkar ban sngap ïa ka sur u paidbah.

Hashwa ïa kane ka la don ka jingpyrshah na u MLA ka Liang Pyrshah, Bah Ardent M Basaïawmoit uba la wanrah ïa ka jingtyrwa ba dei ban weng mardor ïa ka section 39 jong katei ka aiñ, ha kaba la ïashim bynta ruh da kiwei ki MLA ban ïatai, kynthup u Nongïalam ka Liang Pyrshah, Dr. Mukul Sangma.

Haba wanrah ïa ka Amendment jong ka Bill, u Myntri Rangbah Conrad K Sangma u la ong ba u sngewkmen ban pyntip ba ka Sorkar ka la wanrah ïa kane ka Amendment ha kaba ka kyntien ba ong pynkha ïa ki land bank lyngba ka jingthied jaka beit-beit na ki trai la pyndam noh khnang ban ai ka khubor kaba shai ba ka Meghalaya Investment Promotion Authority (MIPA) kan nym treikam shuh da ka jingthmu ban pynkha ïa ki land bank bad ai jaka sha ki nongwan seng kam.

“Kan ym don shuh ka jingthied pynlang ïa ki jaka lane kano-kano ka lynti ban ai pateng lane aiwai ïa ki jaka, hynrei yn pynleit jingmut beit tang ha kaban ïarap wanrah ïa ki nongseng kam, ban ai ka rynsan kaba la don lypa” u la ong, da kaba pynpaw ruh ba kane ka Sorkar kam ju leh da ka bor hynrei kan sngap ïa ka mon bad jingsngewkhia jong u paidbah.

U Conrad u la kular ruh hapoh ka ïingdorbar ba ka Sorkar kan sa khot ïa baroh ki kynhun bapher-bapher kynthup ki seng saiñpyrthei, sengbhalang bad baroh kiba don bynta na ka bynta ban ïakren ïa ki kyndon bapher-bapher ban sa thaw hapoh kane ka aiñ.

U la ong ruh ba kane ka amendment ba la tyrwa da ka Sorkar ka la pynpaw ba ka MSIPF kan ym ïuhroit ïa ka Land Transfer Act, bad bynrap ba baroh ki rukom treikam, ki rule kiba treikam haba phai sha ki district council ruh yn bud ryntih nalor ka jingthung kam ïa ki samla ka Jylla.

U Conrad u la pyntip ruh hapoh ka ïingdorbar ba u la ïakynduh ïa ki MLA bad ki kynhun bapher-bapher, kiba la pynpaw ïa ka jingsngewkhia halor ka mat ba ïadei bad ka jingpynlang jaka.

“Dang ha kine ki khyndiat sngi, ki dkhot ka KSU ruh ki la ïakynduh ïa nga bad ngi la batai bniah sha ki ïa ki amendment bapher-bapher kiba la wanrah ban leh eiei halor ki jingsngewkhia jong ki kynhun bapher-bapher. Hynrei, wat hadien ba la pynshai, nga dang don jingsngew ba kim pat hun satia haba phai sha ka mat ba ïadei bad ka land bank”, u la ong.

U Myntri Rangbah u la pynpaw ruh ba ka ju shim por ïa ki briew ba kin sngewthuh shai halor ka jingthmu jong ka Sorkar, namar ka donkam ïa shibun ka jingpule bad ka jingwad bniah. “Hynrei tad haduh kata ka por, kan bha ïa ngi kum ka Sorkar ban ïatrei jan bad ki paidbah lem bad ka imlang sahlang”, u la ong.

Nalor kane, u Myntri Rangbah u la ban jur ba ka thong jong ka MSIPF ka long beit na ka bynta ban pynsuk ïa ka jingseng kam hapoh ka Jylla.