Nongpoh, Lber 13
Ka Kong Deity Majaw, kaba dei ka MDC ba dang shu jop dang shen na ka Voice of the People Party (VPP) ka la mynsaw ryngkat bad ar ngut kiwei pat hadien ba ka kali ba ka shong ka la hap sha nala ha ki bynta jong ka surokbah National Highway 6 ha Quinine.
Katkum ka khubor ba la ïoh na ki pulit la ong ba kane ka jingjia ka la jia ha ka 8 tarik mynta u bnai ha ka por kumba 11 baje mynmiet.
Ka khubor na ki pulit, ka la ïathuh ba katei ka jingjia ka dei ha ka por ba katei ka MDC jong ka VPP ka dang kiew sha nongbah Shillong lyngba kawei ka kali Grand i10 kaba don ïa u registration number ML05-S-1130 ba la ñiah da u Bah Aldoly Mawthoh na Malki Pdengshnong lem bad uwei pat u rangbah ba la tip kyrteng kum u Bah Geoffrey Pohlong uba ngat lang ruh ha ka jingmynsaw ha katei ka jingjia.
La ïathuh ruh ba ha katei ka miet jong ka jingjia, ïa katei ka MDC lem bad utei uwei pat u rangbah uba la mynsaw, la pynkit noh lyngba ka kali kit nongpang sha Bethany Hospital Outreach ha Nongpoh na ka bynta ban pynïoh ïa ka jingsumar ba kyrkieh bad hadien kata la pynkynriah noh sha kiwei ki jaka ai jingsumar kiba kham heh namar ka jingjur jong ka jingmynsaw.
Katkum ki dur khih ba la ïoh lum, la ïohi ruh ïa ka jingdon jong ki bilor beer thylli hapoh katei ka kali kaba la pynïeng ha thanat Nongpoh.
