Shillong, Lber 13
Ka kynhun ki ‘thei ïalehkai ka Shillong Cricket Association ka la rah ïa ka nam lahduh ha ka lympung ïalehkai U-15 Girls Inter-District Cricket Tournament 2025 ba la pynlong da ka Meghalaya Cricket Association (MCA) bad pynïaid da ka West Khasi Hills District Cricket Association (WKHDCA) ha madan Mawrusyiar, Nongstoiñ.
Ha ka phainal ki ‘thei ïalehkai ka Shillong Cricket Association ki la lah ban pynliem noh ïa ka South West Khasi Hills District Cricket Associa-tion (SWKHDCA) da 41 ron, kaba la wan hadien ba la pyntreikam noh da ka jingïakheiñ jong ka DLS Method kaba jia hadien ka jinglap ba wan ther noh kynsan u slap.
Haba phai sha ka jingïakhun, ka SWKHDCA ka la jop kynting pisa ha kaba ka la ailad shwa ïa ka SCA ba kan tied nyngkong bad ïoh 166 run na bynta ban duh 3 wiket ha ki 20 over.
Ki nam tam ka SCA ha ka por ba ki la wan ban bet ki long ka Janvi Kumar Shah kaba la tied 58 run na ki 67 bol, kumjuh ka Laviola L. Mawlong kaba la ïoh 28 run na ki 32 bol bad ka Prisceca Nongpiur kaba la ïoh 16 run na ki 30 bol.
Katba na ka liang ki nongkawang bol ka SWKHDCA, ka Ribakordor Nongsiej ka la ïoh ban shim shi wiket na ka bynta 40 ron na ki 4 over.
Haba wan ban beh ïa ka thong ka SWKHDCA ka la shem pynban ïalade ha ka jingeh kaba jia hadien ba u slap ruh u la wan ban ther, bad kane ka pynlong ïa ki nongpynïaid ban pynhiar noh ïa ka jingïakhun sha ka 9.3 over, ha kaba ka thong ïa ka SWKHDCA ka long 116 ron.
Hadien ba la pynbeit thymmai, ki ‘thei ïalehkai ka SWKHDCA ki la lah ban ïoh tang 74 ron na bynta ban duh 7 wiket. Kane ka la biang pura ïa ki ‘thei ïalehkai ka SCA ban rah ïa ka nam kum ka lahduh jong kane ka lympung.
Katto-katne napdeng ki ‘thei ïalehkai kiba la kham paw ha ka pali ba ar ki long ka Lawanjingkyrmen Lyngkhoi kaba la tied 13 run na ki 15 bol, Philadaplin Lyngkhoi kaba la ïoh 11 run na ki 9 bol.
Katba na ka liang ki ‘thei kawang bol ka SCA kata ka Prisceca Nongpiur na ki 4 over, ka la ai 17 run bad shim 2 wiket bud pat sa ka Areniankit Warjri na ki 2 over, ka la ai 10 run bad shim 1 wiket, katba ka Laviola L Mawlong na ki 0.3 over, ka la ai 3 run bad shim 2 wiket.
Ki kynrem ki lyndan kiba la wan ban ïa sakhi lang ïa kane ka jingïakhun phainal ki kynthup ïa u Secretary Bah Raynold Kharkamni, u Sengnab Momin, Vice President ka Meghalaya Cricket Association, Bah Peter Macdonald Kharsawian, Apex Council Member ka MCA, Bah Lamborful Wanñiang, President ka Mawrusyiar Youth and Cultural Club, Bah Shembor Rani, Secretary ka Mawrusyiar Youth and Cultural Club, Bah Wanpyntngenbor Lyngdoh Nonglait, President ka West Khasi Hills District Cricket Association bad Bah Mebanphira Swer, General Secretary ka West Khasi Hills District Cricket Association.
