Shillong, Lber 13
Ka Sorkar Jylla lyngba ka tnat Home (Political) ka la phah da ka jingthoh sha u President ka Khasi Students’ Union (KSU) samla Lambokstarwell Marngar ban pyntip ba ka Sorkar kan khot ïa ki kynhun bapher-bapher bad ïa ka KSU ban ïasyllok ha kaba pynkhreh ban thaw ïa ki Rules jong ka Meghalaya Investment Promotion and Facilitation Act, 2024.
Ha ka shithi ba la phah da u Commissioner & Secretary ka tnat Home (Political) ka Sorkar Jylla, Bah CVD Diengdoh ha ka Sngi Palei, u la pyntip ba u Myntri Rangbah ka Jylla, Conrad K Sangma bad ki Symbud Myntri Rangbah kiba la shong jingïalang ha ka 11 tarik mynta u bnai, ki la pyntip ba yn khot lang ïa baroh ki kynhun kynthup ïa ka KSU ban ïasyllok ha kaba ïadei bad ka jingthaw ïa ki Rules jong ka Meghalaya Investment Promotion & Facilitation Act, 2024, da kaba shim ïa ka jingai jingmut katkum ka jingïalang kaba la long ha ka Sngi Balang hadien ba ka KSU ka la phah da ka dorkhas ha ka 20 tarik, Kyllalyngkot, 2025.
“Ïa ki jingpynsngew jong ki kynhun bapher-bapher kynthup ruh ïa ka KSU la kynthup lang bad la kdew ha ka Amendment Bill ba la wanrah hapoh ka Dorbar Mang Tyngka jong ka ïingdorbar thawaiñ ka Jylla,” la ong ka shithi bad bynrap, “Kine ki long, ba ka Meghalaya Investment Promotion & Facilitation Act, 2024 kam dei ban shah pynjngut ha kino-kino ki kyndon jong ka ‘The Meghalaya Transfer of Land (Regulation) Act, 1971’. Ka Meghalaya Investment Promotion & Facilitation Act, 2024 kan ym ïaid lait ïa kino-kino ki kyndon aiñ kiba ïadei bad ki Autonomous District Council, ban plie ïa ki lad ïohkam ïohkam – 90 persen yn mang ïa ki kam bym dei hapoh ophis bad 50 persen ki kam ba hap ban trei ha ophis,” la pyntip ka shithi.
