Ottawa, Lber:
U Mark Carney, u la bam smai kum Myntri Rangbahduh ba thymmai jong ka ri Canada ha ka step Sngi Thohdieng ha ryngkat bad ka kynhun Myntri jong u, la pynbna ka shlem treikam jong u Lat ka jylla ha ka Sngi Balang.
Utei u nongialam bathymmai jong ka Liberal, u la kular ia ka jingkylla kaba suk bad kaba kloi ynda un ioh ban shimti ia ka shuki na u Justin Trudeau, u ba la pynbna ban iehnoh ia ka kam ha u bnai Kyllalyngkot, hadien ba u la synshar la jan 10 snem mynta.
U Carney uba dang thymmai ha ka saiñ pyrthei, 59 snem ka rta, ha ka Sngi U Blei u la shah jied da ka jingjop bun paid kum u nongialam bathymmai jong ka Liberal Party, ha kaba u la jop haduh 86% na palat 150,000 vote kiba la ai jingkyrshan ha katei ka jing iatynjuh bor.
Ka jingkiew jong u sha ka sain pyrthei, hadien ba u la long mynshwa u khlieh jong ka Bank of Canada bad ka Bank of England, ka wan ha ka por ba don ka jingeh ha ka khaii pateng bad ka America.
Ha ka jingkren jingjop jong u sha ki nongkyrshan, u Carney u la pynmih ia ka sur kaba pyrshah ia ka Washington, da kaba ong: “Ha ka khaii pateng kumba long ha ka Hockey, ka Canada kan jop.”
Ha ka Sngi Balang u la ong ba u long ba la pynkhreh ban shong jingialang bad ban iakren markhmat bad u President jong ka America- u Donald Trump ban ïakren ïa ka jingïateh kular ba thymmai ha ka khaïi pateng hapdeng ka US bad ka Canada khnang ban ioh ban tehlakam noh ia ki jingeh baroh kiba ap ia ka ioh- ka kot jong ka ri baroh kawei.
