Tura, Lber 13
Ka ‘Skill Training-cum-Workshop’ kaba shisngi halor ka ‘Muga Silk production and livelihood development in Meghalaya’ na ka bynta ki nongrep ‘Muga’ ka la long ha ka 13 tarik Lber, 2025 ha Training Hall, Central Silk Board (CSB) – Tura.
Ïa kane ka prokram la pynlong da ka tnad Sericulture ka Jylla ha ryngkat ka jingïatreilang bad ka CSB bad la bei tyngka da ka Incubation Centre, NEHU Tura Campus.
Haba kren ha kane ka sngi, u Divisional Forest Officer, West bad South West Garo Hills, Tura, u Ganeshan P. u la ong ba ka tnad Sorkar ka lah ban kynjoh ïa ka jingjop kaba kham khraw haba ka ïatyllilang bad kiwei pat ki tnad treikam na bynta ka jingmyntoi jong ki paidbah ka thaiñ.
Da kaba ïaroh ïa ka jingtrei shitom jong ka Incubation Centre, NEHU Tura Campus hapoh ka jingïalam jong u Campus Director bad Nodal Officer, u la ong ba da ka jingïatreilang bad ka tnad Sericulture ka Jylla, ki lah ban pynbiang ïa ki lad ki lynti kiba kham bha bad ki lad kamai jakpoh na bynta ki paidbah.
U la ong shuh-shuh ba kam dei tang ka jinghikai na bynta ki nongïashim bynta hynrei ka dei ka lad kamai ka ban pynkylla ïa ka ïoh ka kot jong ki paidbah bad kyntu ïa ki (paidbah) ba kin pyrshang ri ïa ki ‘ñiang ryndia ha ka rukom kaba neh khlem da ktah pat ïa ka mariang.
U Dr. Indra Kumar, Scientist- C, CSB – Tura u la pynsngewthuh ïa ki nongïashim bynta halor ka jingdonkam jong ka rep ‘Muga’ kumjuh ban kyntiew ïa ka jingïoh jong ki paidbah bad ban ïoh ïa ki lad ki lynti ba la ai da ka Sorkar.
Ha kajuh ka por, u Nodal Officer, Incubation Centre, NEHU, Tura Campus, u Dr. R Sasikumar u la pyntip ba kane ka Incubation Centre ka la sdang ban pynithuh ïa ki shnong bapher-bapher na Williamnagar, Resubelpara, Jengjal, Mendipathar, Okkapara na ka bynta ka ‘Sericulture Mission’ naduh u snem 2019 bad naduh katei ka por, la pyrshang ban sngewthuh ïa ki jingeh jong ki briew bad ban ïarap kyntiew ïa ki ha ka liang ka jingrep ‘Muga’ kumjuh ban ïarap kyntiew ïa ka jingïoh jong ki paidbah ka thaiñ.
Shuh shuh ka Campus Director, NEHU, Tura Campus, Prof. Sujata Gurudev ka la ong ba ka NEHU hapoh ka jingïalam u Vice Chancellor ka kut jingmut ban ïarap bad kynjoh sha ki paidbah bad pynpaw ba ka Incubation Centre ka don bynta ha ka seng kam seng jam bad ïarap ruh ïa ki nongrep jong ka thaiñ.
Katba u Zonal Officer ka tnad Sericulture ka Ri-lum Garo, u Sanre G. Momin u la ban jur halor ka jingdonkam jong ka rep ‘Muga’ bad ki lad kamai kiba khraw jong ka ïa ki paidbah jong ka thaiñ. Hadien kane, u Kongsan bad kiwei-kiwei ki la sam ïa ki tiar ri jingri sha ki nongïoh jingmyntoi jong ka thaiñ Ri-lum Garo.
