Shillong, Lber 14
U Nongïalam ka Liang Pyrshah hapoh ka Ïingdorbar Thaw Aiñ ka Jylla, Dr. Mukul Sangma u la pynpaw ba ka Dorbar Mang Tyngka 2025-26 kaba la kut noh ha ka 13 tarik mynta u bnai ka kham biang bad seisoh haba ïanujor bad kaba la dep.
Haba kren hadien ba la wai ka dorbar ha ka Sngi Palei, u Dr. Mukul u la ong ba ha kane ka kynti shong dorbar ka la don ka jingpynbeit ryntih bha ïa ki mat ïatai ha kaba la phiah bha ruh ïa ka por, ha kaba u la kdew ba ha ka sngi ba ki Myntri Sorkar ki wanrah ïa ka ‘demand for grant’ na ka bynta ki tnat ba ki bat, ym shym la shim shuh ïa kiwei pat ki kam, hynrei la ïatai sani beit tang ïa ki jingdonkam ba la wanrah ha katei ka phang, na ka bynta ban ailad ban bishar bniah bha ïa ki jingdawa bad jingdonkam jong ki tnat Sorkar ha shwa ban mynjur.
U Nongïalam ka Liang Pyrshah u la pynpaw ruh ba un kham sngewkmen lada dang ai por shuh-shuh ban ïatai sani ha ka por ba wanrah ïa ka ‘demand for grant’. “Ha ki por ban wan ngin pyrshang ban pynthikna ba ngin ïoh 3-4 sngi tang na ka bynta ban bishar bniah ïa ki jingdawa ba la wanrah da ki tnat Sorkar”, u la ong.
Shuh shuh, u la ong ba ha kane ka dorbar ki dkhot (MLA) ki la ïoh ïa la ka lad ban shim bynta, ban pynpaw ïa ka jingsngewkhia kum ki Nongmihkhmat jong ki paidbah.
U Dr. Mukul uba dei u Myntri Rangbah barim u la ong ba ha kane ka dorbar la jied ïa ki mat ban ïakren, ha kaba ïa ki phang ba la wanrah ym shym la lah ban pynrung ha ka jingïatai. U la ong ba ha ka kynti kylli, ki jingkylli kim da bun hynrei ym shym la lah ban shim lut ïa ki jingkylli namar ka jinglyngkot ka por, ha kaba u la bynrap da kaba ong, “Wat la katta kam lei-lei namar kaei kaba donkam ka long ka jingseisoh”.
“Haba ïa ka phang ne ka mat la wanrah hapoh ka ïingdorbar, ka pynlah ïa ki Myntri ban ïoh lut ïa baroh ki jingtip hapoh jong u, kumta, u la nang shai shuh-shuh bad tip kham bha ïa kaei kaba jia”, la ong u Dr. Mukul.
