Shillong, Lber 14
Ka Synjuk ki Nongñiah Taksi Sor bad Khapsor ha ka 14 tarik u Lber, 2025 ka la pynlong ïa ka jingïalang pynthymmai ïa ki nongkitkam ka Synjuk na ka bynta ka samoi treikam jong u snem 2025-2028 ïa kaba la pynlong hapoh ka Hall jong ka Dorbar Shnong Nongmensong, Shillong.
Ki nongkitkam bathymmai ka Synjuk kiba la shah jied ha katei ka sngi na ka bynta ka samoi treikam jong u 2025-2028 ki kynthup ïa u Bah Kmenlang Khonglah kum President, u Bah Wilbert Rynjah kum Vice-President, u Bah Denzil Nongkynrih kum General Secretary, u Bah Pynsuk Youroi kum Asst. Secretary, u Bah Shimlad Rynjah bad u Bah Rocus kum ki Working-President, u Bah Wilson Wahlang kum Publicity Secretary, u Bah B L. Nongrang kum Asst. Publicity Secretary, u Bah James L. Dohkhrut kum Organizing Secretary, u Bah Phrangangi K. Mawlong kum Asst. Organizing, u Bah Banphira Pamin kum Treasurer nalor kiwei-kiwei de.
La jied ïa kine ki nongkitkam bathymmai ka Synjuk da ka jingïamynjur lang jong baroh ki nongñiah taksi kiba la wan ha katei ka jingïalang. Ha kane ka sngi la ïoh ruh ïa ka jingkren na ka liang ki nongkitkam bathymmai ka Synjuk kiba kynthup ïa u General Secretary bad u President.
Haba ai jingkren ha katei ka jingïalang, u President bathymmai ka Synjuk, u Bah Kmenlang Khonglah u la kyntu ïa ki para nongñiah kali ba kin long ki briew kiba don akor-don burom ïa ki paidbah nongshong kali kiba leit-ba wan bad u la kyntu ruh ïa ki nongñiah kali kamai ba ki dei ban pynduh-pyndam noh ïa ka bam-ka dih ha ka por ba ki dang kamai ne ha ka por ba ñiah kali da kaba bynrap ruh ba kam dei ba u khang pyrshah ïa ki nongñiah ba kin dih hynrei ba ki dei ban burom haka por ba ki kamai kali khnang ba kan don ka jingshngaiñ haka leit-ka wan jong ki paidbah nongshong kali.
“Nga kyntu ïa ki para nongñiah kali ban pynduh-pyndam noh ïa ka bam-ka dih ha ka por ba phi ñiah kali, ngam khang ba phin dih kyiad hynrei ban wanrah ka jingshngaiñ ïa ki paidbah nongshong kali”, ong u President.
Na ka liang u General Secretary bathymmai ka Synjuk, Bah Denzil Nongkynrih, u la pan ka jingïatreilang na baroh ki dkhot ka Synjuk khnang ba ki kam-ki jam kin ïaid beit-ïaid ryntih lyngba ka jingïatreilang bad ka jingïatylli.
U la kyntu ruh ïa ki para nongkitkam bad ki dkhot ba kin don ka jingkitkhlieh na ka bynta ban trei ïa ka kam ym ban shu khmih lynti ïa ka bainong ne ka jingsuk hynrei ban long kiba trei shitom ha baroh ki liang.
