Shillong, Lber 14
Ka kynhun jong 24 ngut ki nongrung krem, ka la wad bniah halor katto-katne tylli ki krem ki bym pat bna satia kiba don ha ka Jylla ba kynthup ïa ka ‘Lungchung Khur’ ha Ri-lum Jaiñtia – kaba la kylla long ka krem kaba shiphew haba phai sha ki krem kiba jrong tam ha ka ri.
Kane ka jingwad bniah ka long kum shi bynta jong ka ‘Caving in the Abode of the Clouds Project’ kaba la long hapdeng ka 2 haduh 28 tarik u Rymphang.
Ka Lungchung Khur, ka jingshem kaba kongsan tam ha ka por ba pynlong ïa ka jingwad bniah, ka dei ka krem -wah kaba la wad bniah bad kaba don ïa ka jingjrong kaba 13,618 mitar.
Ha kajuh ka por, ka dei ka krem mawshun kaba khyndai – kaba jrong tam ha India. Ka krem ka don ïa ka lynti wah kaba heh haduh 30 mitar ka jingïar bad jingjrong ha ki jaka, ki lynti krem kiba heh palat 20 mitar ka jingïar bad 15 mitar ka jingjrong bad ka jingkhleh lang jong ki lynti rung, ki jingwan dur ba khun bad ba itynnad lem bad ki jingkhang mawbah.
Kane ka krem ka paw bha namar ka jingwandur jong ki ‘Calcite’ ha ryngkat ka jingjrong bad ka shim ïa ka bynta kaba kongsan ha ka liang mihngi jong ka ‘Muallian Spur’ ha kaba mynshuwa ym shym la tip eiei shaphang ka krem kaba kongsan. Katei ka kynhun, kaba kynthup ïa ki nongrung krem na kiwei pat ki ri, ka la wad bniah ruh halor 4 tylli ki krem thymmai ha ka thaiñ Byrong ha East Khasi Hills, ha kaba la wad bniah ïa phra tylli ki krem. Kine ki kynthup ïa ka Krem Riblai kaba jrong 1,973 mitar, ka Krem Khla – 1,521 mitar, Krem Wallang – 1,393 mitar bad Krem Shanguh – 1,027 mitar.
Ha ka thaiñ Byrong la wad bad jurip haduh 6,210 mitar ki lynti ïaid krem kiba khlem pat shna ‘map’ mynshuwa. Ki don ruh katto-katne ki lynti ïaid bad ki krem kiba dang sah khlem da wad bniah bad la tip ba ki don kiwei pat ki krem ki bym pat wad bniah ha ka thaiñ – kumta yn sa wanphai biang hadien-habud. Shuh shuh ki 13 tylli ki krem ki bym pat tip mynshuwa ha ka thaiñ ba la tip kum ka Krem Soh Shrieh ki la pynshisha khamtam ba ki dei ki ‘Blind Shaft’ kiba don ka jingjylliew hapdeng 8 mitar haduh 26 mitar, lait noh tang ka Krem Soh Shrieh kaba ai lynti 174 mitar ha ka jingjylliew kaba 46 mitar.
