Itanagar, Lber:
Ka Arunachal Pradesh Assembly ha ka sngi Balang ka la mynjur ïa ka Mang Tyngka kaba T.39,842 klur na ka bynta u snem 2025-26 da ka Voice Vote hadien ba la ïakren palat 8 kynta.
U Myntri Rangbah ka jylla u Chowna Mein, uba la wanrah ïa ka mang tyngka ha ka 10 tarik u Lber, u la pynpaw ia ka jingthmu jong ka halor ka jingpynkupbor ïa ka imlang-sahlang bad ka ïoh ka kot.
U la pynskhem biang ïa ka jingkular jong ka sorkar ban kyrshan ïa kiba duk, ki samla, ki nongrep, bad ki kynthei, da kaba pynksan ïa ka bynta jong ki ha ka roi ka par jong ka jylla.
U Mein u la pynthikna ïa ka Assembly ba baroh ki skhim bad ki projek ba la thmu kin pyntreikam hok. U la ban jur ba watla kam shym la don ka jingduna pisa, hynrei ka jingpyntreikam ha ka por kaba biang lyngba ka jingïatreilang hapdeng ki tnad bad ki tnad pyntreikam ka long kaba donkam bha.
Haba ïakren shaphang ka jingpynroi ïa ki khappud, u la kdew ba ki jingthmu bapher bapher jong ka sorkar ki la pynlong ïa ka jingwan buhai shnong shadien, ha kaba ki briew ki leit phai biang sha la ki shnong trai.
U la ai khublei ïa ka sorkar ba la ïalam da u Pema Khandu kaba la thaw ïa ka rukom pynroi kaba khlaiñ ha kine ki 8 snem ba la dep bad u la pynksan ïa ki jingthmu ban pyndonkam ïa ki bynta ba kongsan na ka bynta ban thaw kam thaw jam bad ban kyntiew ïa ka khajna.
Ïa ka mang tyngka la shna sawdong saw tylli ki nongrim ba kongsan-ka jingbei tyngka ha ki briew, ki jingtei, ka ïoh ka kot, bad ka jingpynmih jingmut thymmai.
Ka ïahap bad ka jingthmu jong ka mang tyngka jong ka sorkar pdeng jong ka ‘Viksit Arunachal,’ kaba thmu ban duh ïa ka jingduk, ka jingnang jingstad kaba paka, ka jingsumar pang kaba lah ban ïoh, ka jingïoh kam kaba pura lyngba ki nongtrei ba tbit, ka jingpynrung ïa ka ïoh ka kot jong palat 70 percent ki kynthei, bad ban buh ïa ka Arunachal kum ka jylla ba pawkhmat ha ka jingpynmih soh.
U Mein u la batai ruh ïa ki jingthmu ban bei tyngka ha ka liang ka bor ding, da kaba pynpaw ba ki projek kiba heh kin pynlong ïa ka jingkylla, katba ïa ki jingshakri ha ka koit ka khiah yn pynkhlaiñ da kaba pynthikna ïa ki nongtrei kiba biang ha ki hospital jong ki distrik.
Ki nongthaw aiñ ha kylleng ki kynhun seng ki la kyrshan ïa ka mang tyngka, bad hadien ki jingïakren, ka ïingdorbar ka la mynjur ïa ka da ka jingthep vote da ka sur. Nangta u Lamphang ka ïingdorbar u Tesam Pongte u la pynsangeh shwa shipor ïa ka dorbar.
