Shillong, Lber 14
Ka jingïakhun hapdeng ka Shillong Lajong FC bad ka Mawlai SC ban ïoh rah ïa ka nam lahduh jong ka OC Blue Shillong Premier League (SPL) 2024 kan long ha ka Sngi Saitjaiñ kaba dei artad ka jingïalehkai ba khatduh eh jong kane ka samoi. Ka jingïalehkai kan sdang ha ka por 5:30 janmiet hapdeng ka jingpynthaba jingshai jong ka madan First Ground, ha SSA Stadium.
Ha ka jingïakren bad ki lad pathai khubor na ka liang u Bah Teibor Dohling Assistant Coach ka Mawlai SC u la ong, “Ngi kyrmen ba ki nongkyrshan jong ka Mawlai SC kin wan ban ai kyrshan ïa ngi.” U Bah Dohling u la ong, “lada ngi la lah ban pynliem ïa ka Laitkor, ngi la long ka lahduh lypa hynrei kane ka dei kaba la dep.” U la ong ruh ba baroh kiba don ha ka kynhun ki la pynkhreh bha ïa kane ka jingïakhun na ka bynta ka final.
U Damanbhalang Chyne, kapten ka Mawlai SC u la ong ruh ba ka jingïakhun pyrshah ïa ka Laitkor kam long tang ka jingpynkyndit hynrei kane kan dei kum ka jingai mynsiem na bynta ki rangïalehkai.
Katba, na ka liang ka Shillong Lajong FC ïa kaba la mihkhmat da u Bah Milan Nongkhlaw Assistant Coach bad u rangapkol ka kynhun, u Siwel Rymbai. U Bah Milan Nongkhlaw u la pyntip ba ka SLFC dang shen ka la ïashim bynta ha ka Bordoloi Trophy ha Assam (ha kaba ki la shah rem noh ha ka semi final), kumta ki rangïalehkai kim shym la ïoh por than ban shongthait bad pynkhreh ïa kane ka jingïakhun. “Ngi hap ban ai khublei ïa ki rangïalehkai kiba la pynpoi ïa ngi sha kane ka bynta, ki don katto-katne ki jingïalehkai ha kaba ngi la hiar ka poiñ hynrei ki la leh bha pat ha baroh,” u la bynrap. Na ka liang jong u Siwel, uba mih madan ïa ka Mawlai ha ka SPL jong u snem 2023, u la ong ba ka don ka jingkyndeh kaba khraw ha ki kyrdan ban ïakynduh ïa ka kynhun kaba ïada ïa ka burom na ka bynta ka nam lahduh.
Kum ban shu pynkynmaw ka Mawlai SC ka dei ka lahduh ba bat ïa ka burom bad ki khmih lynti ban ïoh hat-trick (lai sien lynter) ïa ka nam lahduh hadien ba ki la ïohrah teng ha u snem 2022 bad 2023. Ha kawei pat ka liang, ka Shillong Lajong, kaba long ka klob kaba lehkai bha ha ka SPL ha kaba ka la ïoh ban rah haduh saw sien kynthih ïa ka nam lahduh bad kaba khatduh ka dei ha u snem 2019.
Hadien u snem 2019 la wan ka jingpynthut jong ka khlam Covid-19 bad la duh ban pynlong ïa ar tylli ki samoi jong ka SPL. Ka Mawlai, kaba la kiew kyrdan na ka First Division hadien ba la kut ka samoi 2019, ka la hap ban ap kham slem ban wanphai biang sha ka OC Blue SPL hynrei naduh ba ka la ïoh ïa ka lad ban ïakhun ka la pynshisha ba ka long kaba khlaiñbor ha 38 tylli ki jingïalehkai SPL naduh u snem 2022, 2023 bad 2024 ki la shah rem tang arsien bad kam pat shah rem mynta ka samoi.
Kumba long mynta ka Mawlai ka shong ha khlieh duh jong ka miej kheiñ poiñ kata da 45 poiñ, katba ka Lajong kaba bud nadien ka don 42 poiñ. Kane ka mut ba ka Mawlai ka donkam tang ban kiar na ka jingshah rem ban ïoh rah ïa ka nam lahduh kaba lai sien lynter, katba ka Lajong ka donkam ban jop beit lada ka kwah ban long ka lahduh.
Ka SLFC ka hap ban pynkylla ïa ka histori ba dang shen ha ki saw tylli ki jingïakhun ba la dep
jong ka OC Blue SPL namar kam pat shym la lah satia ban pynliem ïa ka Mawlai. Kum ban shu pynkynmaw, kine baroh ar ki la ïakynduh ruh ha ka final jong ka Meghalaya State League ha u Rymphang, bad ha kane ka jingïalehkai ruh ka Mawlai ka la long ka nongjop.
Ka Shillong Sports Association ka la pyntip ruh ba ka lahduh ha kane ka lympung kan ïohrah ïa ka khusnam da ka song pisa kaba T.6 lak, katba ka kynhun ba wan ba ar kan ïoh T.3 lak .
