Nongpoh, Lber 14
Ka Khasi Students’ Union RIST-USTM Unit ha ka Sngi Thohdieng ka la lah ban pynlong ïa ka lympung ïalehkai jong ki samla ka skulbah ïa kaba la ai nam bad pynsah kyrteng ïa uwei na ki ‘riewkhraw ka jaidbynriew halor u synñiang u bynhei jong u sha ka imlang ka sahlang bad ka jaidbynriew hi baroh kawei, u Prof. Barrister Pakem (bam kwai ha dwar u blei). Ïa katei ka lympung ïalehkai kaba shi sngi, la lah ban pynlong mynta ha ka sien kaba lai bad la ai kyrteng kum ka Prof. Barrister Pakem Memorial Sports Meet, 2025. Kum ban shu pynkynmaw, u Prof. Barrister Pakem (bam kwai ha dwar u blei), u dei uwei na ki ‘riewstad ka jaidbynriew uba la long teng kum u MLA bad myntri sorkar ka jylla uba dei khmih ïa ka pule puthi ha shwa ba un shimti pat ïa ka kam Vice Chancellor jong ka skulbah North Eastern Hill University (NEHU) ha u snem 1992 bad long uba nyngkong eh napdeng ki jaidbynriew ka thaiñ shatei lam mihngi ban bat ïa katei ka kyrdan ha NEHU.
Ïa kane ka lympung ïalehkai jong ki samla pule ka RIST-USTM kaba shi sngi, la wan ban pynhap pyrda da u samla Shelkitbok Kharbani, Assistant Education Secretary ka KSU sengkmie ha ka jingdon ryngkat jong u samla Ferdynald Kharka-mni, President ka KSU NKHD, u samla Richie Lyngkhoi, President ka KSU RIST-USTM Unit nalor kiwei kiwei de ki dkhot ka seng.
Ha kane ka sngi, na ka liang ka KSU RIST-USTM, ka la ïoh ban pynlong ïa shibun jait ki jingïalehkai na ka bynta ki samla pule, kiba kynthup naduh ka jingïalehkai mawpoiñ, basketball, futsal, jingïakop tan tyllai, jingïakop mareh bad kiwei kiwei de bad kum ka dak jong ka jingai mynsiem, la sam ruh ïa ki khusnam sha ki nongjop jong kitei ki jingïalehkai bapher-bapher.
Haba kren ha kane ka sngi, u samla Shelkitbok Kharbani bad u samla Ferdynald Kharkamni, ki la pynpaw ïa ka jingsngewkmen ban ïohi ïa ka jingïaieid bad jingtylli jong ki samla pule ka RIST-USTM wat lada kidei kiba wan ban pule na ki thaiñ bapher bapher jong ka jylla bad kyrmen skhem ba kin ïai long tylli kumne ban pynkhlain bad pyntylli ia ka jaidbynriew wat hadien ba ki lah dep ïa ka jingpule ka jong ki ruh.
Kitei ki nongïalam, ki la ong ruh ba kum ki samla pule ki don ïa ka lyngkor kaba khia ban ïakhun ïa ki jingeh kiba kum ka jaidbynriew ka ïakynduh, bad kawei na ki bynta ka long ba kum ki samla pule kin hap ban shimkhia ban minot ha ka jingpule ka jong ki ryngkat bad kiwei kiwei de ki sap ki phong kiba ki don tad haduh ba kin poi sha ka thong kaba ki thmu bad ban noh synñiang pat sha ka imlang ka sahlang bad ka jaidbynriew, ban bud ïa ki matti jong ki ‘riewkhr-aw ka jaidbynriew kum u Prof. Barrister Pakem (bam kwai ha dwar u blei) bad kiwei kiwei de.
Kitei ki nongïalam ki la ong ruh ba ka seng na ka por sha ka por ka khlem shongthait ban ïakhun ïa ki mat kiba ktah matïong ïa ka jaidbynriew kum ka jingrung kyrthep ki mynder, ban pyrshah ïa ka lynti rel katba ka sorkar kam pat lah ban pynbiang shwa ïa ki aiñ kiba khlaiñ ban ïada ïa ka jaidbynriew kum ka Inner Line Permit (ILP) da kaba ong ba kiwei lehse ki lah ban ong ba kadei tang ka jingïakhih, hynrei kum ka seng ka shim ba kane ka dei kam ïap kam im jong ka jaidbynriew.
Shuh shuh, kitei ki nongïalam ki ai ruh ïa ki kyntien sneng kyntien kraw ïa ki samla pule, khamtam ban kiar lai lum lai wah na u drok, uba dei uwei na ki jingdih pynbuaid uba la pynjot ïa kiba bun ki khun samla bad ki longïing longsem da kaba ong ki don ki samla kiba shah pynbiej bunsien ban mad lehse da ka jingkwah tip u long kumno, ki don kiba mad na ka bynta ka jingsngewbha bad ki don kiba mad da ka jingpynbor jong ki paralok. Hynrei ka jingkylli ka long, u jingdih aiu uba hap ban mad kat haduh ban jot ka jingim bad ka lawei lashai la shisngi. Ki paralok ba shisha kim ju ïalam sha ka jingjot, hynrei kin ïarap ban kyntiew bad ai mynsiem iwei-ia-iwei ban poi sha ka thong ka jingjop, ym ban pynngop ha u drok. La ong kitei ki nongïalam.
