Imphal, Lber 14 (UNI)
Saw ngut ki lehnoh ki la shah kem ha ki saw tylli ki jingkhynra ba kyrpang jong ki pulit Manipur bad ki bor pahara ha kine ki 24 kynta ba la dep.
Ki pulit ha ka Sngi Thohdieng ki la ong ba uwei u dkhot jong ka PLA u la shah kem na Sagolband Sayang Kurao Makhong, Imphal West District.
Ha kajuh ka por, ki bor pahara ki la kem ïa uwei u briew uba suba ba dei u dkhot ka UNLF (K), hapdeng ka BP 85 bad ka BP 86 kaba hap hapoh Tengnoupal PS, Tengnoupal District.
Ki pulit ka Manipur ki la kem ruh ïa uwei u dkhot ka PREP??, kata na Kakching distrik. Ha kawei pat ka jingkhynra, ki pulit ka Manipur ki la kem ïa uwei u dkhot jong ka KCP (Apunba) na Imphal East.
Ki pulit ki la ong shuh-shuh ba ki jing-khynra katkum ka jingwad bniah bad ka jingkerkut bad jingtalasi ki dang ïaid shakhmat ban ïoh kurup ïa baroh ki tiar ïaleh ba shah lute/shah knieh/be-aiñ ha ka Jylla.
Ki pulit ka Manipur ki rai ban pynlong ïa ki jingkhynra na ka por sha ka por ban ïoh kurup lut ïa baroh kine ki tiar ïaleh.Ha kine ki 24 kynta ba la dep, la ïoh kurup ïa ki tiar siat bad ki kuli na Imphal East District. Ha kawei ka liang, ka leit ka wan jong ki kali na Imphal sha Mao ka lah ban sdang biang ha ka Sngi Thohdieng hadien ba ki kynhun seng Kuki ki la weng noh ïa ka jingpakhang ha ka surokbah. Ki shipai ryngkew, Assam Rifles, BSF, CRPF bad da ki spah tylli ki kali kiba sahkut ha katei ka surokbah mynta ki la pynkhreh ban ïaid ha katei ka surokbah.
Ki kynhun seng Kuki ki la weng noh ïa katei ka jingpakhang hadien ba ki kynhun seng ki Naga ki la pyrshah ïa katei ka jingpakhang ïa ka surokbah ha kaba wat ki samla pule kiba mut leit thoh eksamin, ki kali kit nongpang kim lah shuh ban ïaid lyngba naba ki maw kiba heh, ki shaka kali ba shah thang, ki dieng kiba la tynrong ha ka surokbah.
Kino-kino kiba leit jingleit ruh ki la shah siat bad haduh mynta kumba 27 ngut ki bor pahara kynthup ki shipai ryngkew, Assam Rifles ki la mynsaw ha ka jingshah thombor ha ki nongïakhih (Kuki) ha ka surokbah.
Katei ka jingpakhang shnong ka la ïalam ruh sha ka jingïap jong uwei u briew bad ka jingmynsaw jong kumba 16 ngut kiwei pat.
