Shillong, Lber 16
U Rev. L.S Nongphlang u la ong ba ka Khasi Jaiñtia Presbyterian Syn-od Pdeng kaba dang shu kha thymmai ka long kum ka kali bathymmai bad u sngewkmen ruh ba ïa kane ka kali bathymmai ki don ruh ki nongñiah kiba tbit.
Ïa kine ki kyntien u la pynpaw shwa ban sam ïa ka ktien jong U Blei ha ka jingïaseng paidbah kaba arsien kaba dei ha ka por 1:30 nohphai sngi kaba la pynkut noh ha ka Sngi U Blei kaba la long ha ka Balang Presbyte-rian Umlyngka, Upper Shillong.
U Rev. Nongphlang u la ong ka jingsted ne ka jingsuki ka shong ha ka jinglong ka surok bad ha ki nongñiah namar u la pynkynmaw lyngba ka ktien U Blei ba kata ka ri khlaw hyndai ym don ki lynti ïa ki khun Israel ban ïaid hynrei ki la ïaid shaphang kaba dei namar ki khmat ki peit sha ka synduk ka jutang haba U Blei un don ryngkat bad ki.
U la ong ba ki khun Israel ki la dep jam ïa ka duriaw basaw bad wah Jordan hynrei ka ri khlaw ka don hakhmat jong ki, ka ri jingkular ka dang ap ïa ki khun Israel ka don ka jingthrang ban poi sha ka ri Kanaan wat la don ki khun Israel ki sngewtynnad ban don ha ri Egypt.
U la ong ba ki parabangeit ka Synod Pdeng ba ka don ka sngi kaba khraw bad ka lawei shakhmat, kam pher la dei ban rung sha ka ri khlaw hynrei ka ri jingkular ka don hakhmat.
Nalor kane, u la ong ba ki nongïalam ki khun Israel ki la ïakren bad u Blei kiba dang don shakhmat bad u ngeit ba ka Synod Pdeng kan bud ïa kata.
“Ka bynta ba ngan kren ha kane ka jingïaseng ba ngan ïathuh shaphang ka jingshah shitom ka jingshah ïap u Jisu Khrist halor ka diengphna” u la ong.
Shuh shuh, u la ong ba ka balang ba u Jisu u la seng ha pyrthei la don ar hajar snem, hynrei ka pyrthei ka la nang sniew bad ngi ainguh ïa U Blei ba ka balang ba shisha kam pat bakla haduh mynta, namar ka kynhun ka ïai bah ïa ka diengphna.
Haba sam ïa ka ktien sha ki riewngeit, u Rev. Nongphlang u la pynshong nongrim na ka Gospel Ioannis na ka Lynnong kaba 19, dkhot 16-18, ki kyntien kiba ong, “Namar kata te la aiti noh ha u ban sahnarphna bad ki la shim noh ïa u Jisu da kaba bah hi ïa ka diengphna u la leit sha jaka ba la khot maloi khlieh, hangta ki la ïa sahnarphna bad ar ngut lem bad u, uwei shawei ka krung bad uwei sha kawei ka krung bad u Jisu hapdeng”.
Ka jingïaseng KJP Synod Pdeng ka dei kaba nyngkong kaba la long ha Balang Umlyngka hadien ba ka Presbyterian Church of India ka la ithuh pura ïa ka kaba la sdang naduh ka 13 tarik bad kut ha ka Sngi U Blei ka 16 tarik Lber 2025.
Ha kane ka jingïaseng paidbah kaba la long ha ka Sngi U Blei, ki nongkren ha ka jingïaseng kaba nyngkong dei u Pastor. T.S Wankhar bad la ïoh ruh ïa ki Choir na ka jingrwai ki samla jong ka Balang Mawlyngngad, Langkyrdem bad Jingïaseng Khynnah Balang Umlyngka.
Ha ka jingïaseng kaba arsien la rwai Choir da ka Standing Choir Shillong Sepngi Presbytery, Jingïaseng Samla Balang Nongthymmai, Balang Umlyngka bad Standing Choir KJP Synod Pdeng.
