London, Lber:
U Keir Starmer, Myntri Rangbahduh jong ka UK, ha ka Sngi Thohdieng u la kynthoh ia u President ka Russia, Vladimir Putin ba um shim khia ia ki jingpyrshang ba la ialam da ka US ban pynurlong ia ka sangeh iasiat ha Ukraine.
U Starmer u la kren ïa kane hadien ba u nongïalam jong ka Russia, u la ong ba u don ‘ki jingkylli kiba kyrpang’ halor kumno ka jingsangeh thma kaba 30 sngi, kaba la tyrwa da ka sorkar jong U Donald Trump, President jong ka America, kan treikam.
Namarkata, utei u nongialam ka UK u la ong ba ka UK kam lah ban ailad ïa u President Putin ban ïalehkai bad ka jingïateh kular jong u President Trump namar u la ong ruh ba ka jingbym kheiñ snep jong ka Russia ïa ka jingtyrwa ban sangeh thma jong u President ka US, ka pynpaw ba u Putin um kwah ban wanrah ia ka shongsuk-shongsaiñ ha Ukraine bad ha ka pyrthei baroh kawei.
Dei kane ka daw ba u Starmer u la ong ba u Putin u pyrshang ban pynslem ia ki jingiakren bam pyn-urlong noh ia ka jingsangeh thma ha Ukraine.
Kumta ruh la khmih lynti ba une u nongialam ka UK, un pan jingmynjur na ki para nongïalam kiba kham bun na Europe bad ka NATO halor kumno kin ioh ban noh synñiang ban ai jingkyrshan biang ïa ka Ukraine ha ka jingïalang ba kyrpang halor kane ka mat.
Namar la ong ruh ba u Starmer bad u President ka France- u Macron ki la ong ba ki kloi ban buh ïa ki shipai jong ka ri Bilat bad France ha madan ha Ukraine, hynrei ym pat lah ban tip lada kiwei pat ki ri ki thrang ban leh kumjuh.
Ka Turkey ka la pynpaw ba ka lah ban don bynta ha ki jingpyrshang ban pynneh ïa ka jingsuk, katba u Myntri Rangbahduh jong ka Ireland pat, u Micheal Martin, u la ong ba ki shipai jong ka Ireland kin nym lah ban iadon bynta ha kano-kano ruh ka jingiakynad jong kiwei pat ki ri.
