Shillong, Lber 16
Ha kawei ka jingjia ba suba ïoh bih na ka bam (Food poisoning), uwei u khynnah uba dang 13 snem ka rta u la khlad noh, katba 28 ngut kiwei pat jong kawei ka hostel (ka bym don jingbit) ba la pynïaid da ka skul shimet ha Mandya ki la shah sumar ha ‘hospital’ ha ka Sngi U Blei hadien ba ki la ud pang kpoh haba ki la bam ïa ka bam kaba la pynkhreh na ka bynta ka jingrakhe ‘Holi’, la ïathuh ki pulit.
Utei uba la khlad noh u dei uba na Meghalaya, ki la bynrap.
Kane ka jingjia ka la jia ha Gokula Vidya Samsthe kaba don ha ka shnong T Kagepura kaba ha Malavalli Taluk jong ka Mandya disrtrik, ong ki pulit.
Da kaba pynshong nongrim na ka jingtohkit banyngkong, u Mallik-arjun Baladandi, Super-intendent of Police, u la ïathuh ba katei ka skul kaba la treikam naduh u snem 1989 kam don laisen ban pynïaid ïa ka ‘Hostel’.
Ki bor pynïaid ki la pyntreikam be-aiñ ïa ka ‘Hostel’ kaba don ha ka mala banyngkong jong ka ïingskul khlem ki jingtei kiba biang, kynthup ïa ki paiñkhana na bynta ki khynnah.
Baroh ki don 202 ngut ki khynnah kiba pule ha katei ka skul, naduh LKG haduh ka klas 8, ha kaba kumba 30 ngut eiei ki khynnah-kiba bun kiba dei na Meghalaya-ki sah ha katei ka ‘Hostel’. La ïathuh ba katei ka skul ka bud ïa ka jingpynbeit ha kaba ki khynnah ‘Hostel’ ki ïoh ïa ka jingbam ba la tam kyntait na ki jingïalang, ki jingrakhe, ne ki jingkhawai shongkurim kiba don hajan, u la ong.
Ha ka 14 tarik u Lber, kawei ka kynhun na Malavalli ka la pynlong ïa ka jingkhawai kum shi bynta jong ka jingrakhe ‘Holi’, ha kaba ki la ai ïa ka ‘Vegetable Pulao’ bad ‘Chutney’ na ka bynta ka jingbam mynstep. Ïa kane ka bam ba la tam kyntait, hadien, la sam sha 30 ngut ki khynnah ha ‘Hostel’ jong ka skul, la ïathuh ki pulit.
Na kitei 30 ngut ki khynnah pule, 24 ngut ki dei na Meghalaya, katba kiba sah ki dei ki trai shnong, u la bynrap.
Ha ka 14 tarik u Lber, ym don uwei ruh na ki khynnah pule uba la pynpaw ba u don ka jingbym biang, jingud ne jingpang. Hynrei ha ka sngi kaba bud, 6 ngut ki khynnah ki la ud ba ki don ka jingpang kpoh bad ki la phah sumar ïa ki ha ‘Hospital’, u la ong.
Ha ka Sngi U Blei, uwei u khynnah, uba dang 13 snem ka rta, u la kyllon bad la pynkit ïa u mar-mar sha hospital, ha kaba la pynbna ba u la khlad noh. Napdeng 28 ngut ki samla pule kiba shah sumar ha ‘hospital’, 7 ngut ki dei kiba kham shitom, bad uwei u don ha ka kor ‘Ventilator’, u la pynpaw.
“Ngi la pynngat katkum ka kyndon 286 bad ka kyndon 106 jong ka ‘Bharatiya Nyaya Sanhita’ bad ngi la kem ïa 3 ngut ki briew ha kaba ïadei bad kane ka jingjia,” u la bynrap.
Kiba shah kem ki kynthup ïa u nongshet uba pynkhreh ïa ka bam, u ‘Warden’ jong ka ‘Hostel’ uba la sam ïa ka bam kaba sah khlem da peit bniah ïa ka jinglong-jingman jong ka, bad u trai skul namar ka jingbym shimkhia, u la ong.
U Dr. Kumar, Deputy Commissioner ka Mandya, u ïathuh ha ki nongthoh khubor, ba la pyntip sha ka tnad ka koit ka khiah, ha ka 15 tarik Lber, bad ki ophisar, ki la leit jngoh ïa katei ka skul. Baroh ki don 30 ngut ki khynnah kiba la bam ïa katei ka bam bad ki la ngat ne ïoh bih na kane ka bam.
“Sngewsih ba uwei u khynnah pule ba dang 13 snem ka rta u la khlad noh, kaba long kaba sngewsih haduh katta-katta. Ngi la pyntip sha ki kmie ki kpa jong u. Ki 29 ngut kiba sah ki dang shah sumar, ha kaba 8 ngut na ki, la dep pynkynriah sha Mandya Institute of Medical Sciences. La pynmih ïa ki hukum ban pynkynriah ïa kiwei ruh ki khynnah pule, naba ka MIMS ka don ki doktor ba la pyntbit,” u la ong.
“Ka jingthmu ba kongsan jong ngi ka long ban sumar ïa ki khynnah skul kiba shah ktah bad ban pyntikna ba kin koit noh. Yn pynlong ïa ka jingtohkit halor ki jaka jong ka skul, ki jingbit, bad ki nongsam marbam, bad yn shim ïa ki sienjam kiba biang katkum ka aiñ,” u la bynrap.
“Ha ka jingpeit bniah, ka jingbym shimkhia jong ka skul ka paw shai-kumno ki la ailad ïa ka kynhun nabar ban pynbiang bam khlem ka jingbit? Kim don bor ban pynïaid ïa ka ‘Hostel’,” u la pynpaw.
Shuh shuh na ka liang u Myntri Rangbah ka Karnataka, u Siddaramaiah u la pynpaw ka jingsngewkhia jong u halor katei ka jingjia ha ka rynsan lad pathai ‘X’ bad ong ruh ba u la bthah ïa u DC ka Mandya ban pyntikna ïa ka jingsumar kaba paka ïa ki khynnah bad ban leh da kaba tyngeh ïa kito kiba donkti.
U Siddaramaiah ha kajuh ka por, u la pyntikna ba ka longïing jong utei u khynnah ba la khlad kan sa ïoh ïa bai lutksan namar katei ka jingjia.
