Shillong, Lber 16
U Myntri kam pohïing ka Sorkar Pdeng uba dei ruh u Myntri ka tnad Cooperation, Amit Shah, ha ka Sngi U Blei u la pynïaid ïa ka jingïalang khmih bniah halor ka jinglong-jingman jong ka jingpyntreikam ïa ki lai tylli ki aiñ ‘Criminal Law’ bathymmai ha ki Jylla ka Thaiñ Shatei Lam Mihngi ha Guwahati.
U Myntri u la pyllait ruh ïa ka kot kaba la ai kyrteng ‘New Criminal Laws: Standard Opera-ting Procedures and Rules’ ba la pynkhreh da ka CID, Assam.
Ka jingïalang ka la khmih bniah ïa ka jingpyntreikam bad ka jinglong mynta jong ki kyndon thymmai bapher-bapher kiba ïadei bad ki pulit, patok, ïingbishar, jingpynngat kyndon, bad ‘Forensics’ ha ki Jylla Thaiñ Shatei Lam Mihngi.
Haba ai jingkren ha ka jingïalang, u Myntri u la ong ba hapoh ka jingïalam jong u Myntri Rangbahduh ka ri, Narendra Modi, ka Sorkar Pdeng ka angnud ban ai sha ki nongshong shnong ïa ka rukom bishar hok kaba sted bad kaba khuid. U la ban jur ba ban pynkhlaiñ ïa ka suk ka saiñ, ka long kaba donkam ban pynngat mukotduma ïa ki kam runar khlem kano-kano ka jingpynslem.
U Shah u la ong ba ki Jylla ka Thaiñ Shatei Lam Mihngi ki donkam ban minot shuh-shuh ha ka ban pyntreikam ïa kine aiñ pynshitom bathymmai. U la pynpaw ruh ba ynda la pyntreikam pura ïa kine ki aiñ, kan don ka jingkylla kaba khraw ha ka jinglong-jingman jong ka aiñ bad ka suk ka saiñ ha ka thaiñ, da kaba pyntikna ba ïa ka hok yn pynïoh da ka Ïingbishar ba ha khliehduh ka ri hapoh lai snem naduh ba la ujor ïa ka ejahar haba ïadei bad kano-kano ka mukotduma.
U la ong ba kam dei ban don kano-kano ka jingtuklar saiñ pyrthei haba pynngat ïa ki mukotduma kiba ïadei bad ki kam lehnoh, ka jingshah pynïap ha u paidbhur, bad ki kam runar ba la pynbeit ryntih. U la ong ruh ba baroh ki Jylla ka Thaiñ Shatei Lam Mihngi ki dei ban pyntikna ïa ka jingai jinghikai kaba 100% sha ki pulit halor kine ki aiñ bathymmai.
U Shah u la kyrpad ruh ïa ki Myntri Rangbah jong ki Jylla ka Thaiñ Shatei Lam Mihngi ban pynlong ïa ka jingïalang khmih bniah man u bnai halor ka jingpyntreikam ïa ki aiñ. U la bthah ïa ki Director General ka tnad pulit (DGP) bad ki Chief Secretary jong ki Jylla ba kin pynlong ïa ka jingïalang khmih bniah man la ka 15 sngi.
Shuh shuh u Myntri u la bynrap ba ka jingsynshar ka dei ban poi sha ki kyrdan ba sha trai, bad ki thanat pulit ki dei ban long ki jaka ha kaba ki briew ki ïoh ïa ka hok. U la ban jur ba kane ka lah ban long tang lada pyntreikam 100% ïa ki 3 tylli ki aiñ bathymmai.
Nalor kane, u la ban jur ruh ïa ka jingdonkam kyrkieh ban pyntreikam ïa ka ‘e-Sakshya’.
Haba kdew ba ki pulit ka Thaiñ Shatei Lam Mihngi la slem bah ki pynleit jingmut nyngkong eh ha ka ban ïakhun pyrshah ïa ki lehnoh, ha kawei ka liang, u la ong ba namarba mynta la jan pynduhjait ïa ki kam lehnoh ha ka thaiñ, ki pulit ki dei ban kynriah ïa ka jingpynleit jingmut jong ki ban ïada ïa ka jingim, ki jingdon-jingem bad ka burom jong ki briew.
