Jowai, Lber 16
Ka lehniam ‘Kbai Mooknor’ hapoh ka Raij Jowai ka la sdang ha ka 15 tarik Lber ha ka jingïalam u Dolloi Ma Puramon Kynjing ryngkat ka jingsynrang lang u Pator u Ma Raymond Nartiang, u Langdoh, ki sangot kumjuh ki waheh wasan ka Raij Jowai.
Ïa ka Kbai ne pyrta hajrong u Mooknor la pyndep da u Chutia uba la pynkynmaw ïa ki nongshong ïew shong hat, ki nongleit ïew leit hat ba “La poi ka por ka samoi hapoh ka shnong ka Raij ban sdang ka niam ka rukom ‘Thoh Langdoh’ te naduh kane ka sngi ym long shuh ban rah shyieng rah shruh na kiwei ki shnong shapoh shnong poh Raij ne hapoh ka shnong ka Raij sha kiwei ki shnong; kaba mut naduh mynta ka sngi ki khun ka Ñiamtre kiba hapoh ka Raij Jowai bad kiba don sha kiwei ki Raij ki shnong ki donkam ban long kiba ri burom ïa ka adong ñiam kiba la dep pynthiah pynshong naduh u mynbarim”.
U Dolloi Ma Puramon Kynjing u la ïathuh ba ka jingpyndep ïa ka Kbai Mooknor ha kane ka sngi ka long shi bynta ka jingsdang ïa ka niam Thoh Langdoh ka ban pyndep ïa ka jingainguh ai bhah ai bynta ïa u blei Langdoh ha ka 19 tarik mynta u bnai ha ka jaka ba don u Moo Langdoh ha Khloo Lyngdoh.
