Shillong, Lber 16
Ka Manchester United ka la pynbna ha ka Sngi Ba-ar ïa ka jingthmu ban tei ïa ka stadium kaba heh ha ka pyrthei kaba lah ban ngiam haduh 1 lak ngut ki paidbah nongpeitkai ha United Kingdom, ka ban palat ïa ka jinglah ban ngiam ha Wembley.
Kane ka klob na England kaba la jop haduh 20 tylli trophy ka thmu ban tei marjan bad ka madan ha Old Trafford, kaba pynlah ïa ki ban pynneh-pynsah ïa ki jingtreikam ha ka por ba ki dang tei.
U Jim Ratcliffe, uba don bynta kum u trai jong kane ka klob, u la ong: “Ka madan ïalehkai jong ngi kaba mynta ka la shakri bha ïa ngi ha kine 115 snem ba la leit noh, hynrei kam long shuh kaba ïahap kyrdan bad ki madan ïalehkai kiba bha tam ha ka pyrthei. Da kaba tei hajan ka jaka kaba la don lypa, ngin sa lah ban pynneh pynsah ïa ka jinglong jong ka Old Trafford, katba ngi dang thaw ïa ka madan ïalehkai kaba thymmai shisha kan ïarap ban pynkylla ïa ka jingïakynduh jong ki nongkyrshan.”
Ka klob kam shym la pynpaw ïa ka jinglut jong kane ka projek ne ka por ban pyndep. U Ratcliffe, uba la theh pisa $1.3 billion na ka bynta ban ïoh bynta 25% ha ka United ha u snem ba la dep, u la ithuh ïa ka stadium kaba thymmai kum ka jingthmu ba kongsan.
Wat la ka la pyrkhat na ka bynta ka jingmaramot ïa ka Old Trafford, hynrei ka jingtei ïa ka jaka thymmai ka la mih kum ka lad kaba la jied.
U Ratcliffe u la pynbna: “Mynta ka sngi ka dei ka jingsdang jong ka jingïaid lynti kaba sngewtynnad haduh katta-katta sha ka jingpynpoi ïa kaei kaba kan long ka madan phutbol kaba khraw tam ha ka pyrthei.”
Ka klob ka thmu ïa kane ka madan ïalehkai kum shi bynta jong ka jingpynroi kaba kham heh ïa ka Old Trafford, kaba khmih lynti ban kyntiew ïa ka ïoh ka kot kaba 7.3 billion pound ($9.4 billion) na ka bynta ka ïoh ka kot jong ka UK. Ka sorkar ka la pynpaw ïa ka jingkyrshan, wat la ki jingtip ba bniah halor ka jingai pisa kim pat lah ban batai.
U Norman Foster, uba dei u nongshna pynwan dur (architect) na ri Bilat, un ïalam ïa katei ka jingshna dur.
Mynta, ka Wembley Stadium, kaba dei ka jaka jong ka kynhun ïalehkai phutbol jong ka ri England, ka don ïa ka jaka ïalehkai kaba heh tam ha UK, kaba lah ban ngiam haduh 90,000 ngut ki nongpeitkai.
Ka Old Trafford, ka madan ïalehkai phutbol kaba heh tam ha Britain kaba don 74,000 tylli ki jaka shong, ka paw ba ka la rim bha haba ïanujor bad ki jaka ïalehkai ba mynta kum ka Tottenham Hotspur Stadium, kaba pynlong ïa ki jingïalehkai NFL.
U Omar Berrada, Uba long u heh duh jong ka United, u la ong: “Ka jingthmu ba jlan jong ngi kum ka klob ka long ban don ïa ka kynhun ïalehkai phutbol kaba kynsai tam ha ka pyrthei kaba ïalehkai ha ka madan ïalehkai kaba biang pura ha ka pyrthei.”
Na ka liang u Alex Ferguson u la pynpaw ba ka klob “ka dei ban long kaba shlur bad shim ïa kane ka kabu ban tei ïa ka ïing kaba thymmai, kaba biang na ka bynta ka lawei, ha kaba lah ban thaw ïa ka histori kaba thymmai.”
