Nongstoiñ, Lber 17
Ki jingeh bad ki jingjynjar khamtam haba wan ka pang ka jhia kaba neh bun bun snem, ka wanrah ïa ka jingrit mynsiem bad ki jingkhuslai mynsiem ïa ki longïing ki longsem ha ka imlang ka sahlang.
Ka ïing ka sem jong u Bah Chedral Lyngkhoi, 50 snem ka rta na ka shnong Marshan Namlang ha West Khasi Hills ka dei kawei na ki longïing kaba la mad ïa kane ka jingeh, ha kaba une u rangbah wat hapdeng ka jingnoh ka rta u hap ban sumar ïa lai ngut ki khunswet.
U Bah Chedral Lyngkhoi, u la ïathuh ba ka para jong u, ka Thiansy Lyngkhoi kaba la khlad noh ha ka snem 2020, ka la iehnoh ïa ki 3 ngut ki khunswet ba kynthup uwei u shynrang uba don ka jingshitom bad uba thiah pang la slem bad ar ngut ki kynthei kiba shitom hynrei la ïarap sumar bad shimti da ki jaka ri khunswet la 2 snem eiei, kawei ha Shillong bad kawei ha Nongpyndeng ban sumar bad phah skul ïa kita ar ngut ki kynthei namar kine ruh bun ki shitom.
U la ïathuh ruh ba naduh ba la khlad ka kmie, u hap sumar ïa kitei ki khunswet bad u la pynpaw da kaba ong, “Ka sohsat shisha ïa ka ïing ka sem jong ngi, ki don ki Kmienah Kmiesan hynrei haba ïa duk ïa jynjar kumjuh, ta ka daw u hap shim jingkitkhlieh hi”.
La ong ruh ba u hap ban lilam noh naduh ki jingri jingdup kum ki masi ki blang ki jaka-puta tang ban pynbiang bai dawai ïa ki.
Shuh shuh u la ong ruh ba naduh 2 snem eiei ba la wan shimti ïa ki ar ngut kynthei ba ri khunswet u la kham sngew sting shisha. Hynrei naba u shynrang uba la samla ruh u im ha ka shitom, u la ïalam wad dawai kylleng kylleng hynrei bun ym ïadei bad la pynneh ha Shillong namar ka kham ïadei. Kumta namar ka jingduk u la hap hap ban lilam noh ïa baroh ki jingdon jingem.
Halor kane ka jingeh ïa kaba kane ka longïing une u rangbah ka ïakynduh, ha kine ki khyndiat sngi ba la dep ka Hynñiewtrep Youths’ Council (HYC) Lai Lyngdoh Circle hapoh ka jingïalam u samla Wandappynkmen Marweiñ, President bad samla Presslanroy Thongni Asst GS ryngkat ka jingsynran lang u samla Lumlang Kharsyiemlieh President HYC West Khasi Hills District ryngkat ki dkhot ka HYC Marshan Namlang Unit, ka la hiar sha ka shnong Marshan Namlang ban leit jngoh ryngkat ka jingïarap da u khaw, ki marbam bad ki nep kup ryngkat ki jingduwai lem ïa katei ka ïing.
“Ngi kyrpad ïa ki paradoh parasnam, para thaiñ ban ïarap lem ïa kane ka longïing kaba mad ïa kane ka jingeh. Phi lah ban ïakynduh ïa i, ngin kloi ban ïalam,” ong ka kyrwoh na ki nongïalam ka HYC.
