Ampati, Lber 17
Ha ka jingkhynra kaba sted bad kaba ïaid beit, ki shipai peitngor jong ka 50th BN Border Security Force (BSF) Meghalaya, ha ryngkat ka jingïatreilang bad ki pulit ka thaiñ, ki la lah ban khanglad ïa kawei ka kali bad bat ïa 4 ngut ki nong Bangladesh ryngkat uwei u nong India (nongñiah Auto) katba ki dang pyrshang ban jam sha shiliang khappud ri ha South West Garo Hills.
Ïa kitei kiba la shah bat, ha ryngkat ka kali ba la ïoh kurup, la aiti noh sha ki pulit ka thanat Mehenderganj, na ka bynta ban pynngat ha ki kyndon aiñ.
Na ka liang ka BSF ka la ban jur halor ka jingkut jingmut jong ka ban ïada ïa ki khappud jong ka ri – ban pyntikna ïa ka jingshngaiñ jong ka ri kumjuh ban khanglad ïa kino-kino ki kam be-aiñ na shiliang sha shiliang khappud.
“Kane ka jingtreikam kaba jop ka pynpaw ïa ka jingïatreilang jong ka BSF-Meghalaya bad ki pulit ka Jylla ha ka ban pynneh ïa ka jingpeitngor ha shilynter khappud jong ka India-Bangladesh,” ong ka kyrwoh khubor na ka BSF.
