Shillong, Lber 17
Hadien ka jingjia suba shah thang jong ar tylli ki kali kiba la jia ha ka shiteng synñia bad ha ka step phyrngab jong ka 12 tarik u Lber, 2025 ha kaba kawei ka jingjia ka dei kaba jia ha Laban bad kawei pat ha Nongmensong Dong Kadiang, u Superintendent of Police (SP) ka East Khasi Hills District, Bah Vivek Syiem, u la ong ka jingtohkit halor kine jingjia ka dang ïaid shakhmat ban lap ïa ki briew kiba donkti ban leh ïa kane ka kam.
“Ka jingtohkit ka dang ïaid hi namarba ka la jia ha ka por mynmiet-mynïong kaba khlem don ba ïohi bad ngi la dep ban pynrung da ka mukotduma halor kane”, ong u SP. Kum ban shu kdew hangne, kawei ka kali Alto 800 kaba don ïa u registration number ML 05-K-7549 kaba dei trai jong u nongtrei ka Railway Guest House ka la shah thang ha ka 12:30 mynmiet katba ka dang pynïeng ha ka phyllaw jong katei ka shlem treikam kaba don ha Laban.
Katba kawei pat ka jingjia shah thang ha Nongmensong Dong Kadiang kaba la jia ha ka step phyrngab jong ka 12 tarik u Lber, 2025, kawei ka kali Maruti Swift Dzire ronglieh kaba don ïa u registration number ML05-AB-1290 kaba dei ka kali ba la pyndonkam da ka shlem treikam Meghalaya Infrastructure Development Finance Corporation (MFIDC) ka la shah thang ha katei ka jaka ha kaba ka la julor na ka bynta shakhmat.
Ha kajuh ka por, kine ar tylli ki kali ki la shah thang hadien ka jingïakhih jong ka Khasi Students’ Union (KSU) kaba la leit ban tur kynsan sha Rilbong ka lad ban rung sha ka ïingdorbar thawaiñ ka Jylla, halor ka nongrim ban pynpaw ïa ka jingpyrshah kaba jur ïa ka jingthmu ban wanrah ïa ka lynti rel hapoh ka Jylla bad kumjuh ban pyntreikam ïa ka Meghalaya State Investment Promotion & Facilitation (MSIPF) Act, 2024.U SP u la ong ba haduh mynta ym pat shym la don sakhi hynrei na ka liang ka tnat pulit ka dang wad ïa kino-kino ki sakhi-sabut khnang ban lap ïa ki runar kiba donkti halor kane ka jingjia bad ong ruh ba ka tnat pulit kan sa buddien bha lyngba ki kor ringdur ne ki CCTV camera.
“Ngi dang pyrshang ban peit la ki don ne em ki CCTV na ki paramarjan ha katei ka jaka ba shah thang ki kali hynrei haduh mynta ngim pat ïoh ïa kino-kino ki durkhih bad lada ngi ïoh ruh ngin sa buddien”, ong u SP.
Haba kylli, hato kane ka jingshah thang jong ar tylli ki kali ka dei hadien ka jingïakhih ka KSU, u SP u la ong ba lehse katei ka jingshah thang ki kali ka dei kaba don bynta lang bad katei ka jingïakhih ka seng ha katei ka sngi hynrei na ka liang ka tnat pulit kan dang ïai buddien ban tohkit bha halor kane ka bynta.
“Lehse, ka don bynta bad ka jingïakhih ba ki la jia ha ki ar bynta hynrei ïa kata ngin hap ban tohkit bha”, bynrap u SP.
