Shillong, Lber 17
Hadien palat 10 snem ba ka Jylla ka la shah khang ban tih dewïong namar ka jingtih thliew khnai, ha ka Lah Sngi U Blei ka 17 tarik u Lber kan dei ka sngi sah khana kynmaw ïa ka Jylla Meghalaya da ka jingplie u Myntri Rangbah, Conrad K Sangma ïa ka par tih dewïong kaba nyngkong ka ban sa tih katkum kane ka juk stad mynta kaba la tip kum ka ‘Scientific Mining’, ha East Jaiñtia Hills.
Kane ka jingtih dewïong da ki kor saïan ka la sdang ha Saryngkham-A’ Coal Mine, Byndihati, East Jaiñtia Hills District ka ban dei ruh ka ‘Scientific Mining’ Coal Block ba nyngkong eh ha Jylla.
Ha kane ka sngi la ïadonlang u MLA ka thaiñ uba dei u Myntri Sorkar, Bah Kyrmen Shylla, ka MLA ka Sutnga-Saipung, Kong Santa Mary Shylla, u Executive Member ka Jaiñtia Hills Autonomous District Council (JHA DC), Bah Hambertus Nongtdu, u Deputy Commissioner ka East Jaiñtia Hills District, Shivansh Awasthi, u Superintendent of Police, Giri Prasad, kiba shah khot sngewbha bad ki paidbah ka thaiñ.
Haba ai jingkren lyngba ka ‘video conference’, u Conrad u la ai khublei ïa baroh kiba don bynta lang ha kane kam kynthup ïa ki ophisar, ki trai par, kiba aplai ïa ka jingshim wai, u trai jong katei ka par dewïong, Bah Dapmain Shylla na Byndihati, kiba la noh synñiang ha ka ban lah sdang ïa ka ‘scientific mining’ ha ka Jylla.
U la ong ba ha kine ki 10-11 snem ba la leit noh ki dei ki snem kiba buh ha ka jingeh kaba khraw ïa kiba bun ki nongshong shnong jong ka Jylla khamtam eh ïa kito kiba don bynta bad ka kam tih dewïong, kiba la ïakynduh diengpyngkiang ha ka kamai kajih ka jong ki.
U Myntri Rangbah u la pynkynmaw ba ha u snem 2018 haba u la shimti kum u Myntri Rangbah ka Jylla, ka kam tih dewïong ka dei ka mat kaba la buh hakhmat eh da ka Sorkar bad lyngba ka jingtrei shitom ha kine ki 6-7 snem kiba la dep, mynta kine ki jingpyrshang baroh ki la seisoh da ka jingsdang ïa ka ‘Scientific Mining Coal Block’ kaba nyngkong ha Meghalaya.
“Ka jingïaid lynti kam shym la long kaba suk. Ka jingïaid lynti kam shym long ruh kaba shai kdar. Ha ka jingshisha, ka la long kum ka jingïaid ha ka jaka ba ym lah ban tip ïa ki jingeh kiba kumno yn ïatyngkhuh katba ngi dang ïaid shakhmat, kaei kaba pynlong ïa ngi ban ïaid shakhmat ka long ban ïohi ba ïa ki jingeh kaba ki paidbah ki la mad dei ban wad ïa ki lad ki lynti ban pynbeit noh ïa ki bad ban wanrah biang ïa ka jinglong jingman kaba biang na ka bynta ki paidbah bad ki nongshong shnong bad ka dei katei kaba la ai mynsiem ba ngin ïaid shaphrang”, la ong u Conrad.
U Myntri Rangbah u la ong ba ka jingpynïaid ïa ki kam kaba kiwei pat kiba aplai ban ïoh jingbit ban tih dewïong katkum ka jingstad saïan ka dang ïaid shakhmat.
U la ong ba ka Meghalaya ka la mad ïa kiba bun ki jingeh, nalor ka bynta kaba ïadei bad ki teknoloji.
“Ngi la don ïa ka hok halor ka jaka bad ïa ka jinglongtrai ïa ka jaka kaba ïapher na kiwei pat kiba don ha ka ri bad kumta ki don bun ki kyndon, ki jingeh ki bapher kiba la mih kaba la pynlong ïa ngi ba ngin shimpor ban pynurlong ïa kane ka jingtih dewïong”, u la ong.
U Conrad Sangma u la ong ruh, ba da kane ka jingplie ïa ka jingtih dewïong kaba nyngkong lyngba ka jingstad saïan, ha ki snem ki ban wan, kin dang bun ki ban sa bud lang bad ka sorkar ka pynshlur ïa kiwei ruh ba kin aplai khnang ba kane ka rukom treikam kan long kaba biang kumba ju long.
