Shillong, Lber 17
Ki samla pule ha National Institute of Technology (NIT) Meghalaya, ha ka Lah Sngi U Blei ki la mih na ki kamra klas ban ïakhih pyrshah ïa ki bor pynïaid hadien ba kim lah shah shuh ïa ka jingbym lah pynbiang ïa ki jingdonkam ba man la ka sngi hapoh ka Campus ha Sohra.
Kine ki samla pule ki la pynlong da ka jingshong kyllaiñ mungor hakhmat ka Ophis Administrative Block, ha kaba ki la pynpaw ïa ka jingsngewkhia halor ka jingbym khuid ka bam ka dih, ka jingbym khuid ka sawdong-sawkun, ki jingbym don ka jaka kilan met (gym) ïa ki samla kynthei, ka jingthut ka bording bad ‘internet Wifi’ nalor ka jingtrei torti ïa ka jingtei haduh ba la jreiñ um ha ki kamra ha ka por ba jur slap.
Katkum ki durkhih ba la ring da ki samla pule, la ïohi ïa ka um kaba mih kum ka umkor hapoh ka kamra bad mih ruh kum ka shyngiar na ki ‘socket’ bording ha ka kamra jong ka hostel ki samla shynrang.
La ïathuh ba ki samla pule ki la dep phah teng da ka shithi sha u Director katei ka jaka pule, ban pynpaw ïa baroh ki jingsngewkhia, hynrei ym shym la leh eiei satia haduh mynta. Kane ka jingmynthi jong ki bor ba dei khmih ka la pynbor ïa ki samla pule ban shim noh da ka lynti ban shu ïakhih.
Nalor kane, ki samla pule ki la ujor ruh halor ka jingbym ïoh ïa ka umbam-umdih kaba khuid bad ka jingbym don ki lad ai jingsumar haba pang kynsan-kynsan.
Ha ka jingujor la kdew ïa ka jingsma iwtung ka um, ka jingduna jong ki nongtrei ba pynkhuid ïa ka ‘campus’ bad ka jingsngew baheh jong ki nongsam bam kiba ju kyntait ban ai tam ïa ka bam haba pan.
Haba kren halor kane, ki samla pule ki la kam ba ka bam kaba la shet ruh ka long kaba khawot bad ka bym ïahap katkum ka jinglong kane ka thaiñ, ha kaba ki la kynnoh ba u nongshet uba ïoh kam u la wanrah da ki nongshet kiba nabar Jylla.
Ha ka dur ba la phah da ki samla pule ka pyni ruh ba u dai ba la ai bam sha ki u dei uba dap da ka um kum ka syrwa kaba ïasyriem ïa ka syrwa shynrai. Ha kawei na ki dur, la ïohi ruh ïa u skaiñ ba ïap ha ka dohkha ba la shet kylla.
Haba ïadei bad ka ‘internet WiFi’, ki samla pule ki la ïathuh ba man ka Sngi U Blei, ki bor pynïaid kim ju ai satia ïa u ‘WiFi’ bad ha kiwei-kiwei ki sngi ka bun ba ka thut, kaba la ktah bha ïa ka jingpule wad bniah bad ïa ka pule-puthi ha katei ka campus.
Lah ban pynkynmaw hangne ba ïa ka NIT Meghalaya la pynkynriah na ka campus ba shipor na Shillong sha Sohra ha ka 16 tarik Kyllalyngkot mynta u snem.
Haba pynpaw ïa ka jingbitar halor ka jingshimpor ban tuklar ïa ki jingsngewkhia, ki samla pule ki la dawa na ki bor pynïaid ba ki dei ban leh eiei noh mardor, bad pynpaw ruh ba kum kine jingjia ki la pynthut ïa ka jingpule bad pynthohbria ïa ka nam jong katei ka jaka pule.
