Guwahati, Lber:
Ka Narcotics Control Bureau (NCB) ka la ïoh ban kurup kumba 109 kilo u drok Methamphetamine uba shong dor T.88 klur, ha ki ar tylli ki jingkhynra ba ïatreilang ha kylleng ka jylla Manipur bad Assam.
La kem saw ngut ki dkhot jong ka kynhun khaïi drok jong ka pyrthei, la ïathuh ki heh sorkar ha ka Sngi U Blei.Ki heh jong ka NCB, ki ïathuh ba une u drok, uba mih na Moreh ha Manipur, ka shnong khappud bad ka Myanmar, u dei uba thmu ban leit sha Karimganj ha Assam.
Ha ka 13 tarik u Lber, ki ophisar jong ka NCB Imphal Zone ki la kem ïa kawei ka trok hajan Lilong, Manipur, ha kaba ki la lap 102.39 kilo ki dawai pynbuaid ba la buhrieh hapoh ka synduk tiar jong katei ka trok.
La kem ar ngut ki briew ha katei ka jaka, bad ïa uba lai, uba la ithuh kum u nongpdiang uba la thmu, la kem hadien.
Ha kajuh ka por, ki ophisar jong ka NCB Guwahati Zone ki la bat ïa kawei ka kali SUV hajan khappud Assam-Mizoram hajan Silchar. Ha ka jingkhynra ïa katei ka kali la lap ïa u drok ba la buhrieh haduh 7.48 kilo hapoh ka spare tyre. La kem ïa u nongshong jong ka kali.
“Ka tyllong jong ki tiar ba la khanglad ka dei na Moreh, Manipur, bad ka jaka ba la suba ba ka leit ka dei ka Karimganj kaba don ha Assam. Ka jingtohkit kaba kham bniah ban kem ïa kiwei pat ki riew shimet kiba donkti ha kane ka kam ka dang ïaid shakhmat,” ong ka khubor sorkar.
Ki heh ophisar jong ka NCB, ba kynthup ïa u Director General Anurag Garg, la buh por ba kin ïakynduh ha Imphal ban peit ïa ka jingtohkit bad ban weng ïa ka jingwan tuid ki drok na Myanmar.
