Shillong, Lber 17
Ha ka nohphai sngi jong ka 16 tarik u Lber, 2025, ki nongshong shnong bad nongshong dukan kiba don hajan ka jingkieng Duwan Sing Syiem kaba don ha Mawkdok ki la lap ïa kawei ka metïap jong u rangbah briew narum jong katei ka jingkieng.
Halor kane ka jingjia, na ka liang U Nongsaiñ Hima haba ïoh ban ïakren bad u Superintendent of Police (SP) ka East Khasi Hills District, u Bah Vivek Syiem, u la ïathuh ba katei ka jingjia ka la jia ha ka Sngi U Blei jong ka 16 tarik u Lber, 2025 bad ïa utei u briew la tip kyrteng kum u Joel Khyriem na ka shnong Mairang-Laitdom bad u don 24 snem ka rta.
U SP u la ïathuh ruh ba na ka liang ki bahaïing-bahasem jong utei u samla ki la ïathuh ba utei u samla uba la khlad u dei uba don jingduna ha ka bor pyrkhat. Kumta la pyllait ban leh ïa ka Post-Mortem bad la dep ban aiti noh ïa ka met jong utei u samla sha ki bahaïing-bahasem.
Haba kylli, hato utei u samla u la shah pynïap ne ka dei ba u la leh hi, na ka liang u SP u la ïathuh ba katkum ka jingtohkit na ki briew kiba sakhi bad kiba don ha katei ka jaka, ki la ïathuh ba ki khlem shym la ïohi satia ba kin don kino-kino ki briew ki ban thombor ne khynñiat ïa utei u samla hynrei la lap pat ïa ki dak-ki shin ha ka met jong utei u samla na ka bynta ka khlieh bad ka met kaba lehse, ka dei na ka jinghap jong u najrong katei ka jingkieng.
”Ha ka jingtohkit ïa ki briew kiba sakhi kiba don ha katei ka jaka, ym shym la ïohi ban don ba khynñiat ne ban shah thombor ïa une u briew. Ki don ki jingmynsaw na ka bynta jong ka khlieh bad ka met namar ba u la hap najrong”, ong u SP.
