Skopje, Lber:
Ha kane ka jingjia, la ong ba katei ka jaka leh kmen ‘Nightclub’ kaba don ha North Macedonia, ka la kem ding ha ka step Sngi U Blei, ha kaba 59 ngut ki la khlad noh syndon na katei ka jingjia pluh ding ba shyrkhei, tang namar ka jingbkla na ki pynher ding ‘fireworks’ ha ka jaka pynbyrngia hapoh katei ka jaka leh kmen.
Katei ka ding ka la sdang ban klang ha katei ka Club Pulse ha ka por kumba 3 baje eiei bad katei ka jaka leh kmen ka don ha ka shnong Kocani kaba sha ka phang Mihngi jong katei ka ri, ha kaba ki don da ki spah ngut ki briew kiba leit rung sha katei ka jaka ha katei ka step.
Watla katta, la ong ba ki briew jong ka kynhun pynlip ding bad ki kynhun sumar ki la leit mareh mar-mar sha katei ka jaka tang mar ia ioh jingtip halor katei ka jingjia ban ioh ban pyllait im ia kitei kiba shah ktah baroh, hynrei ka long kaba sniewbok ba haduh katei ngut ki mynsiem briew ki la shu duh ei namar ka jingbym lah ban tehlakam ia katei ka ding ha ka por kaba biang.
Namar la ong ba katei ka jaka ka la kem ding namar ki jait tiar ba la pyndait ban pynitynnad ia katei ka jaka ha katei ka jaka put- jaka tem.
Ka tnat kam poh iing jong ka North Macedonia ki la pynbna ruh ba ki la pynngat kyndon bad kem noh ia 4 ngut ki briew haba iadei bad katei ka jingjia ha katei ka step. Ki bor pynïaid ki dang phah tohkit bniah ruh ia ki daw bad ki jingthmu ioh lehse don kiba mut khnang ban leh ia katei ka kam thombor ha katei ka sngi.
Nalor jong kitei kiba khlad, ki don sa kumba 155 ngut pat kiba la ngat bad mynsaw ha katei ka jingjia bad ia kitei baroh la pynkit sha ki hospital bapher kiba don hajan jong katei ka jaka. Hynrei, ia kiba la kham mynsaw jur pat yn pynkit noh sha ki jaka sumar kiba kham biang bad kham tbit, khnang ba yn ioh ban ai ka jingsumar kaba pura bad kaba biang tam naka bynta jongki ha ka por kaba biang.
Ki bor pyniaid jong ka Kocani Hospital, ki iathuh ba kitei kiba leit ban shah sumar ha katei ka jakasumar ki dei kiba naduh ka rta 14 haduh 25 snem.
