Mawkyrwat, Lber 18
Ki ‘riew runar bym lah ban ithuh ha ka 15 tarik u Lber 2025 ki la thang dusmon ïa kawei ka jingkieng dieng kaba dei ka lynti ïaid kali na Maheshkhola sha Sohhylleng kaba hap hapoh ka Ranikor Civil Sub Division, South West Khasi Hills District.
Ka jingthang dusmon jong ki runar ïa katei ka jingkieng ka la ktah haduh katta-katta ïa ka leit ka wan jong ki paidbah nongshong shnong khamtam ïa ki kali kiba kit ïa ki marbam mardih bad kiwei kiwei ki jingdonkam namar katei ka jingkieng ka dei kaba pynïasoh ïa ki lai tylli ki shnong, kita ka Sohhylleng, Amarsang bad Umthengkut.
Katkum ki tyllong khubor ba la ïoh lum na u Executive Engineer (EE) ka PWD Roads Ranikor Division, Bah D Kyndiah, u la ïathuh ba ka jingwiang ding jong ki ‘riew runar hapoh katei ka thaiñ kam dei shuh ka sien kaba nyngkong hynrei ka dei kaba la ju jia na ka por sha ka por.
Kumta na ka liang ka ophis PWD Roads Ranikor Division ka la maham tyngeh ïa ki briew kiba ju wiang ding ïa ki jingkieng bad lada lap ba ki pynjot ne pynjulor kin shah pynngat ha ki kyndon aiñ kynthup ka jingshah set patok bad ka kuna kaba heh.
Shuh shuh na ka liang ka ophis ka la kyntu ruh ïa baroh ki nongshong shnong ban ïatreilang bad ki bor ba dei peit bad ban pyntip lada lap ïa kum kitei ki kam kiba pynjot ïa ki jingtei paidbah.
Ka ophis PWD Roads Ranikor Division ka la pynrem jur ruh ïa ka jingleh ‘riewkhlaw jong kitei ki briew bad ka la ujor ruh da ejahar ha thanat Nonghyllam.
