Shillong, Lber 18
Ka Nongaiktien jong ka Sorkar MDA-II kaba dei ruh ka Myntri ba khmih ïa ka tnat ka Koit ka Khiah, Kong M. Ampareen Lyngdoh ka la ong ba ka Sorkar Jylla kan shim khia ban pynthikna ba ka Sorkar Karnataka ka dei ban pynshitom da kaba tyngeh ïa kiba donkti ha ka ban ai jingbam da kaba long bih sha ki khynnah skul ha Malavalli, kaba la wanrah syndon sha ka jingkhlad noh jong ar ngut ki khynnah Khasi bad palat 20 ngut ki la kem pang.
“Ngi buh ïa ka thong ba ka Sorkar shathie (Karnataka) ka dei ban shim kam, ngin ym hun lada ka shu shim kam tang khyndiat,” la ong ka Myntri haba pynpaw ba ka Sorkar kan ym hun ïa ka jingpynshitom kaba malu-mala ïa kiba donkti.
Ka Myntri ka la ong ba ka Sorkar ka la phah ïa ki ophisar ban tih bniah ïa kaei kaba la jia, bad kane ka jingphah ïa ki ophisar ka pyni ïa ka jingbitar ïa kum kine ki jingjia.
“Ka long shisha kaba kthang haduh katta-katta, ka jingbitar kaba jur bad ngim dei ban shah ba ki jingjia ba kum kane ban wan long”, ka la ong.
Haba bynrap halor ka jingphah jong ka Sorkar ïa ki ophisar na kane ka Jylla ban leit jngoh bad tih bniah ïa ka daw tynrai kaba la wanlam sha katei ka jingjia, ka Kong Ampareen ka la ong ba ki jingkynnoh ki long kiba bun jait, hynrei ka Sorkar kan pyntip ïa kaei kaba pynlong ïa katei ka jingjia hadien ba ki ophisar kiba leit sha Karnataka ki wanrah ïa ka kaiphot sha ka Sorkar.
“Kan long biej ïa ngi ban shu ngeit ïa kaei kaba shu ïohsngew hamsaïa, ngin pynshong nongrim ïa kaei kaba ngi ïohsngew bad ngin peit ba kum kine ki jingjia kin ym jia”, ka la ong.
Ha kajuh ka por ka Kong Ampareen ka la pynpaw ïa ka jingsngewsih bad phah ïa ka jingsngewlem halor ka jingkhlad noh jong ar ngut ki khynnah skul ka Meghalaya, na ka jinglong bih ka bam hapoh ka hostel jong ka Residential School ha Malavalli, Karnataka.
Ka Myntri ka la kyntu ba dei ban long kiba peitngor bha bad ban ai ka jingpynsngewthuh ïa ki kmie ki kpa haba ki phah ïa ki khun sha ki jaka pule, ban pynthikna shwa ïa ka jinglong jingman jong ki jaka pule.
“Kane ka jingjia ka la long kum ka jingpynpeit mat ïa kaba donkam ban da khmih bniah shwa. Ngi dei ban pynthikna ban pynsngewthuh bha ïa ka imlang-sahlang bad ban nang bad sngewthuh na katei ka jingjia bad ban kiar ba kan ym jia shuh hadien habud”, ka la ong.
Ka Sorkar Meghalaya ka la pynbna ban ai jingïarap T.3 lak sha ki longïing jong ki khynnah kiba la khlad noh na katei ka jingjia, bad ka la pynbna ruh ban buria ïa ka jinglut baroh ïa ki khynnah skul kiba don hapdeng ka jingshah sumar.
