Jowai, Lber 18
Kawei ka khynnah kaba dang 4 snem ka rta, ka la khlad noh hashen katba ka hynmen jong ka, kaba dang 11 snem ka rta ka la lait im hadien ba ka ding kaba klang bha ka la bam duh ïa ka ïing ka jong ki, kaba don ha ka shnong Sahsniang-B.
Kane ka jingjia pluh ding jong katei ka ïing ka la jia ha ka janmiet jong ka 17 tarik mynta u bnai. Ka khynnah kaba la khlad ha kane ka jingjia dei kaba la tip kyrteng kum ka Elisha Iakai, katba ka hynmen kaba la lait im la tip kum ka Glorify Iakai, kiba dei ki khun jong ka Kong Itaima Iakai bad Ma Mewos Shadap na ka shnong Sahsniang-B ha West Jaiñtia Hills District.
Haba ïakren bad Ma Founder Syngkon, uba dei u dkhot ka Executive Committee ka shnong, u la ïathuh ba kane ka jingjia ka la jia ha ka por kumba 8 duna eiei katba ka kmie kaba la leit sha ïew ka dang don ha lynti ban wan phai sha la ïing.
U la ïathuh ba ha ka por ba jia kane ka jingjia, kine ki khynnah ki don tang ar ngut bad ki la ïohthiah. Ka hynmen ka Glorify Iakai hadien ba ka la ïohsngew ïa ka jingmeh jong ka ding, ka la pyrshang katba lah ban kyrsiew ïa la ka para, bad ban rah ïa ka para imat kam sngew lah shuh, kumta ka la mih shabar ïing bad pyrta jingïarap na ki marjan ïing.
U la ïathuh ba ka daw jong ka jingkem ding jong kane ka ïing ka la lah ban dei na ka jingmeh ding ha dpei.
Ki pulit pynlip ding bad ki pulit na Raliang ruh ki la wan poi ha katei ka jaka, hynrei ka ding ka la dep bam shngiam ïa katei ka ïing bad ki jingdon jingem baroh.
