Agartala, Lber:
U Myntri Rangbah ka Tripura, u Manik Saha u la pynpaw ïa ka jingsngew jong u ban wad ki lad ki lynti na ka bynta ban lah ban pynïoh jingkyrshan pisa na ka bynta ban kyntiew ïa ka jylla ha kiba bun ki liang.
Kaba kham kongsan na ka bynta ban pynbha ïa ka jylla ka long na ka bynta ki lanot kiba la ïohmad ïa ki jingeh na ki jingthombor jong ki bor ka mariang khamtam na ka jingshlei um. Hashwa, kane ka sorkar jylla ka la kyntu ïa ka 16th Finance Commission ba kan pynkiew ïa ka mang tyngka na ka bynta ka jylla.
Ha ka jingshlei um kaba la pynjulor dang shen, ka jylla ka la mad ïa ka jingduhnong kaba T.15,000 klur, la ong u Myntri Rangbah hangne.”Ngi la ïakren ïa ki mat bapher bapher bad ka 16th Finance Commission. Nalor kata, ngi la batai ruh balei ka sorkar jylla kam shym la lah ban ai DA ïa ki nongtrei jong ka ha ka kyrdan kaba ïaryngkat kyrdan bad ki nongtrei sorkar kmie. Kane ka la long namar ka jingshah pynduh ha ka 14th Finance Commission,” la bynrap ha ka jingïakren bad ki nongthoh khubor hangne.
U Saha u la ong, “Ngi la pyntip ruh sha ka FC shaphang ki jingtei ba la pynlong ha ka jylla. Ka 16th Finance Commission ka la sngewnguh ïa ka jinglong ryntih jong ka pla tyngka jong ka jylla. Kan jin da la shah pynduhnong lada ngim shym la pynneh ïa ka jinglong ryntih ha ka rukom pynïaid ïa ka pisa tyngka,” u la ong.
U la ong ba ka sorkar ka la pynpaw ruh ïa ka jingtap jong ka khlaw kaba rben jong ka jylla (73 per cent) bad ka jingduna jong ki jaka madan kiba donkam ban seng ïa ki karkhana heh.
“Namar ba ka jylla ka shim kham bun ka lyer jakhlia namar ka jingtap jong ki khlaw kiba rben, ngi la wad ban pynkiew ïa ka khusnam ba kyrpang na ka 10 percent sha ka 20 percent. Ka 15th Finance Commission ka la wanrah ïa ka khusnam ba kyrpang kaba 10 percent sha kito ki jylla kiba don ki khlaw ba rben,” la ong u Myntri Rangbah.
Ka Finance Commission ka long kum ka kynhun ai jingmut, la ong u Myntri Rangbah bad bynrap, “Ka jylla ka la kyntu ïa ka Commission ban pynkiew shibun ïa ka khusnam ban pynurlong ïa ka thong jong ka Tripura ba la kiew (viksit Tripura) ha u snem 2047.”
Haba kylli hato ka jylla ka kyrshan pisa beit beit sha ka Tripura Tribal Areas Autonomous District Council (TTAADC), u Saha u la kyntait ban batai bniah halor kane ka kam.
