Shillong, Lber 18
Ka kynhun ïalehkai phutbol ka ri India ka la long ba la khreh ban ïakhun pyrshah ïa ka Maldives ha ka jingïalehkai paralok (FIFA International Friendly) ka ban long mynta ka Sngi Balang ha Jawaharlal Nehru, Shillong ha ka por 7 baje janmiet.
Wat la ka dei ka jingïakhun ban pynkhreh ïa ka kynhun jong u Manolo Marquez na ka bynta ka jingïalehkai kaba kongsan bha jong ka AFC Asian Cup 2027 Qualifier pyrshah ïa ka Bangladesh ka ban long ha ka 25 tarik mynta u bnai, hynrei ka dei ka por ba kongsan bha namar ba ka India kan ïakhun ha ka sien kaba nyngkong eh ha Shillong. Kan dei ruh ka jingïalehkai kaba nyngkong eh jong u Sunil Chhetri, nongthep kol ba bun eh jong ka India, hadien ba u la pynbna ban wanphai biang sha ka jingïalehkai bar ri.
Haba pynpaw sha ki lad pathai khubor ha ka Sngi Ba-ar, u Marquez u la ong, “Ka dei ka sien kaba nyngkong ba ngin ïalehkai hangne, hynrei nga la ïatreilang bad shibun ki coach bad ki nongïalehkai na kane ka jaka. Nga tip ba ka dei ka jaka kaba itynnad bha. Nga kynmaw haba nga peit ïa ki jingïalehkai jong ka Durand Cup ha u snem ba la lah, ha kaba nga la ïohi ïa ka jingitynnad ka madan ïalehkai.”
Kumjuh, u rangïalehkai shadien kane ka kynhun u Mehtab Singh u la pynpaw, “Ngi sngewkmen ban don ha Shillong. Ka dei ka sien kaba nyngkong ba ka kynhun ïalehkai jong ngi kan ïalehkai hangne. Ka thaiñ shatei lam mihngi ka long kaba paw ha ka jingbun ki nongkyrshan. Ka phutbol ka dei ka jingïalehkai kaba heh tam hangne. Ban rah ïa ka phutbol sha ki thaiñ bapher bapher ka dei ka kam kaba khraw na ka bynta ka phutbol India.”
Na ka bynta u Marquez, ka jingïalehkai ba nyngkong eh jong u naduh ba u la shimti kum u coach jong ka India ha u Nai-tung mynshem snem ka dang sah sa shi taïew, bad ka jingïalehkai paralok ka ai ka lad kaba khraw ban pynbha ïa ka kynhun jong u shwa ka jingïalehkai kaba kongsan. “Ka dei ka jingïalehkai paralok ban pynkhreh na ka bynta ka jingïalehkai Asian Cup. Ka paw shai ba ngi kwah ban jop. Ngi la tip ba ka thong ha ki por ba la dep jong ka FIFA ka long ban poi ha ka jinglong kaba bha tam na ka bynta ka jingïalehkai ba nyngkong eh pyrshah ïa ka Bangla-desh ka ban long ha ka Sngi Ba-ar.”
“Ngam tharai ba ngin ïakhun da kajuh ka kynhun pyrshah ïa ka Bangladesh bad ban ïakhun ha ka sngi Balang. Ka paw shai ba phim lah ban pynkylla ïa baroh 11 ngut. Don ki ban ïalehkai biang ha ka Sngi Ba-ar. Nga ngeit skhem ha baroh ki nongïalehkai jong nga. Ka dei ban long ka jingïalehkai kaba itynnad bad ka jingpynkhreh na ka bynta ka Bangladesh.”
U Marquez u la pynthikna ruh ïa ka jingdon bynta lang u Chhetri ha kane ka jingïalehkai paralok ka ban long ka jingïalehkai kaba 152 jong u na ka bynta ka India.
“Kaba thikna ba u Sunil un ïalehkai katto-katne minit. Ngam tip la un ïalehkai naduh kaba sdang ne un mih na kaba shong ben. Ngi lah ban pyndonkam ïa hynriew ngut ki ban mihpli na jaka shong ben, kumta baroh 17 ngut ki lah ban ïalehkai, bad nga tharai ba u Sunil un long uwei na ki.”
Ka Maldives kaba don ha ka kyrdan 162 ha ka pyrthei, ha kaba ka la duna haduh 36 kyrdan ïa ka India, kan ïakhun ïa kane ka jingïalehkai paralok kum ka jingpynkhreh na ka bynta ka Asian Cup qualifier pyrshah ïa ka Philippi ka ban long ha ka sngi Ba-ar.
U coach ka Maldives, Ali Suzain, u la ong, “Khublei shibun ïa ka jingpdiang sngewbha jong phi hangne. Ngin ïakhun pyrshah ïa ka Philippi ha ka 25 tarik, kumta ka dei ka jingïakhun ka ban pynkhreh ïa ngi. Hynrei ka dei ka jingïalehkai kaba kongsan namar ba ka India bad ka Maldives ki dei ar tylli ki kynhun kiba khlaiñ bha ha kane ka thaiñga kyrmen ba kan long ka jingïakhun kaba itynnad.”
