Shillong, Lber 18
Kan long ka sien kaba nyngkong eh ba u rangïalehkai jong ka English Premier League, u Hamza Dewan Choudhury un wan ban ïuhkjat ha kane ka nongbah Shillong na ka bynta ka wat kaba nyngkong jong ka AFC Asian Cup 2027 Qualifier ka ban long ha ka 25 tarik mynta u bnai.
U Hamza uba dei u rangïalehkai ka Leicester City bad la shim wai ïa u da ka Sheffield United kaba shim bynta ha ka EFL Championship (second tier) ha England, un wan ban shim bynta na ka bynta ka kynhun ïalehkai ka Bangladesh pyrshah ïa ka India ka ban long ha Jawaharlal Nehru Stadium Shillong ha ka por 7 baje janmiet.
Kumba ka long mynta utei u rangïalehkai shadien na England, u la poi ha Sylhet Airport ha ka Lah Sngi U Blei bad la pdiang sngewbha ïa u da ki bor pynïaid phutbol jong ka ri Bangladesh.
Ha shwa ba leit sha Bangladesh, u Hamza u la ïalehkai pura 90 minit ha ka Sheffield Derby pyrshah ïa ka Sheffield Wednesday ha ka EFL Championship (second tier) ha ka janmiet jong ka Sngi U Blei. Ka Sheffield United ka la pynjop da 1-0 kol lyngba u Rhian Brewster.
U Hamza u la poi ha Bangladesh ryngkat bad ka kmie, ka Rafia Dewan Choudhury, ka kurim jong u, ka Olivia Choudhury, lai ngut ki khun bad ar ngut ki hynmen jong u. U kpa jong u, u Dewan Murshid Choudhury, u la poi lai taïew kham mynshwa ban pynbeit ïa ki jingdonkam na ka bynta ka jingwan phai jong u khun jong u sha la ïing.
Ha kawei pat ka liang, ka kynhun ïalehkai phutbol jong ka Bangladesh, ka dangkilanmet mynta ha Saudi Arabia bad kan wan poi sha Dhaka ha ka Sngi Ba-ar. Te kumta u Hamza un sdang ïa ka jingkilanmet ha ka sngi Balang hapoh ka jingïalam u coach u Javier Cabrera.
Ka Bangladesh kan mih ha ka 20 tarik ban leit sha Kolkata bad kan wan poi sha ka nongbah Shillong ha ka 23 tarik mynta u bnai.
Kumba ka paw ka Bangladesh ka long ka kynhun kaba khlaiñ bor bad mynta lei-lei ka la lah ban kynthup lang sa ïa utei u rangïalehkai ba kynsai na England, katba ka India ka la sei da ki rangïalehkai kiba la ju ïalehkai teng ha ki snem kiba la leit kynthup lang ïa u khlur ïalehkai ba la shongthait, u Sunil Chhetri.
Lah ban kdew, u Hamza u la mihkhmat ruh ïa ka kynhun ïalehkai Under-21 jong ka England ha u 2018-19.
