Nongstoiñ, Lber 19
Ka met jong u heprit Namebantei Marweiñ, 12 snem ka rta, uba la khlad noh hadien ba la suba jur ba u la bam ïa ka jingbam kaba sniew ba la sam ha hostel jong kawei ka skul ba u la pule kaba don ha ka Mandya district jong ka Jylla Karnataka, ka la wan poi noh ha ka janmiet jong ka 19 tarik u Lber 2025 ha ka ïing hapoh ka shnong Sohparu ha West Khasi Hills District.
Lah ban kdew hangne bad katkum ka jingïathuh ki bahaïing une u heprit u la khlad noh ha ka janmiet jong ka 17 tarik u Lber 2025 ha ki por 7 duna eiei. U dei ruh u khun jong ka Kong Shimtisful Marweiñ bad u Bah Tobarlin Nongsiej na ka shnong Sohparu.
U Bah Golonsar Marweiñ, kñi jong une u heprit ha kajuh ka por kum Secretary ka shnong Sohparu haba kren bad ki lad pathai khubor hadien ba ka met jong u Namebantei ka la wan poi sha la ïing, u la ong ba na ka liang ka ïing ka sem bad ka Balang ki la dep ban ïa pynbeit ba ka jingleit ontep ïa ka met ba dang sah jong une heprit kan long ha ka 20 tarik Lber, 2025 ha u lum jingtep ka Balang Seventh day Adventist Sohparu (SDA) ha ka por 1 baje nohphai sngi.
U la ïathuh ba katkum ka jingpyntip jong ki doktor, ka jingpang kaba u ïoh ka dei ka jingpang prie bad pynhiar hynrei ban ong ba kane ka jingpang ka dei ka bih kumba ïohsngew nangne-nangtai ïa kata na ka liang jong ka ïing ka sem kam pdiang namar ki pdiang ïa kaei kaba ki doktor ki ïathuh.
U Bah Golonsar u la ïathuh ruh ba ka Lei Shynshar Culture Society Meghalaya, ka dei ka seng kaba ïarap ïa ki thaiñ nongkyndong bad kaba btin lynti kumno ban phah skul ïa ki khun ba kin nang kin stad.
U la ïathuh ruh ba kane ka seng la bun ki khynnah, ki samla, naduh kiba dang leit skul haduh kiba hapoh ka 10 snem ka la ïarap bad une u heprit ruh u dei uwei na ki khynnah uba leit lang bad kane ka Lei Shynshar Culture Society kaba la ïarap ban phah skul ïa u shaduh Karnataka. Hynrei U Blei un shym la ibit ïa u ba un buh jrong ïa ka rta ka jong u, u la buh noh ïa u ha ka rta kaba 12 snem bad u la leit sha Karnataka ban leit skul la kumba 2 snem mynta hynrei sngewsih ban ong ba haba u la don hangtei ha skul ha Karnataka u la ïoh ïa ka jingpang.
Shuh shuh u la ïathuh ruh ba hadien ba u la ïoh ïa ka jingpang, ki nonghikai ki la phone sha ki bahaïing bahasem bad ki la ïathuh ba ki la rah sha hospital bad ynda ki la poi ha hospital u la nangjur nangjur ka jingpang bad la rah ïa u sha ICU bad ki doktor ki la sumar hok ïa u, ki la trei shitom namar ki la pyni ruh sha ki bahaïing ïa ka video (dur khih) ha ka por ba ki sumar ïa u.
“Hynrei sngewsih kum ki dkhot ka ïing, ngi dang bynnud ngi kwah ba une u heprit un dang sah bad ngi hynrei U Blei um ibit shuh, u la shim noh sha lade hi bad ngi shu pynkohnguh ïalade ha U Blei da kaba ngi la ong baroh ka ïing ka sem ba ngin shaniah ha U Blei bad ïa kaei kaba U Blei u leh ïa kata na ka liang ka ïing ka pdiang sngewbha,” u la ong.
U la ai khublei ruh ïa ka Apollo Hospital ha Karnataka namar ka la trei shitom na ka bynta ka bit ka biang jong une u heprit. U la ai khublei ruh ïa ka Lei Shynshar Culture Society kaba la shim ïa ka jingkitkhlieh, wat ha ka jinglut ka jingsep ban pynpoi ïa ka met jong une heprit naduh Karnataka shaduh Guwahati bad wat haduh ban pynpoi sha la ïing, hynrei na ka liang ka ïing ka sem hi ka kwah ruh ban pynlut na lade ha kaba kumta ki bahaïing ha sem ki la leit shaw noh na Guwahati shaduh sha la ïing.
