Shillong, Lber 19
Ka KSU Bengaluru Unit ka la leit ban jngoh bad ban ai mynsiem ïa ki khynnah Khasi kiba la ïoh kem pang na ka jingbam kaba la sah, bad ka la ïoh ruh ban ai ka jingïarap ïa kitei ki khynnah kiba donkam ha kum kane ka jingjia ba sngewsih.
Ha kine ki sngi ba la dep, ka jylla Karnataka ka la mad ïa ka jingjia ba sngewsih ha kaba ki khynnah pule na ka skul Gokula Vidya Samsthe ha Malavalli, Mandya district, ki la ïoh pang hadien ba ki la bam ïa ka jingbam kaba la sah (Food poisoning). Kane ka la wanrah ïa ka jingduh noh ïa ar ngut ki mynsiem jong ki khynnah pule na Meghalaya kiba la tip kyrteng kum u Khrehlang Khongtani na ka shnong Lyndem bad u Namebantei Marweiñ na ka shnong Sohparu.
Ha katei ka jingjia la don kumba 120 ngut ki briew kiba la ïoh pang hadien ba ki la bam ïa ka jingbam kaba la pynkhreh ha kawei ka hostel ha Malavalli. Kine ki kynthup ïa 40 ngut ki khynnah skul jong ka Gokula Vidya Samsthe, ha kaba 24 ngut ki khynnah skul ki dei na Meghalaya.
Na baroh kine kiba pang, ar ngut ki la khlad noh, katba kiwei ki dang don ha ka jaka sumar ha Mandya Institute of Medical Sciences, bad lai ngut na ki, ki dang shah sumar hapoh ICU bad kiwei pat ki la kham khlaiñ.
Ki dkhot jong ka KSU Bengaluru Unit man ka sngi ki leit ban jngoh ïa ki khynnah Khasi ba thiah pang. Ha ka jingïasyllok bad ki doktor ka hospital, ki dkhot ki KSU ki la ïoh jingtip ba ym pat long ban ai kino-kino ki jingbam ïa kine ki khynnah hynrei tang ka um snepkor. Ki dkhot ka seng ki la shem ba ym shym don ban pynbiang ka um snep kor ïa kine ki nongpang, bad kumta bran-bran ki la mareh ban leit thied ïa ki snepkor bad ai ka um snepkor ïa baroh ki khynnah Khasi ba thiah pang, ong ka kyrwoh khubor ba la phah da u President ka KSU Bengaluru Unit u samla Donboklang Nongphud.
