Shillong, Lber 19
Ka Rotary Club of Orchid City Shillong ha ka sngi Balang ka 19 tarik Lber 2025 ka la pynkup burom ïa saw ngut ki samla kiba la wanrah nam wanrah burom ïa ka Jylla ha kiba bun ki liang.
Kine saw ngut kiba la shah pynkup burom ki kynthup u samla Aiboklang Paul Wanniang uba dei u rangïalehkai arm wrestling, Bah Burt Reynold Nongrum nongoh shrong ba pawnam, Kong Darilin Jovita Masharing kaba dei ka nongrwai bad nongthaw jingrwai bad u samla Pynnehbor Mylliemngap uba dei u rangïalehkai martial art ba la khur bun tylli ki takma ïa ka Jylla bad India.
Ïa kane ka jingïalang pynkup burom la pynlong ha Shillong Club ïa kaba la long kongsan da u Rotarian Sanju Choudhury uba dei u President barim jong ka Centennial Rotary Club, Pocatello, Idaho USA, ha ka jingïadonlang u Bah Antony War President ka Rotary Club of Orchid City Shillong, Bah Abir Suchiang uba dei u Secretary, ki dkhot jong ka Rotary Club bad ki bahaïing bahasem kiba shah pynkup burom.
Na ka liang u Kongsan haba ai jingkren u la ïaroh bad ai khublei ïa kine ki saw ngut kiba la shah pynkup burom bad kumjuh ruh ïa ka Rotary Club kaba la ithuh ïa ka jingtrei shitom jong ki. Ha kane ka sngi u Kongsan u la ai jingïarap ruh ïa ka Rotary Club of Orchid City Shillong da ka cheque kaba 1 hajar dollar na ka bynta ban ïarap ïa ka jaka ai jingsumar ha Jongksha.
