Shillong, Lber 19
Ki bor pynïaid distrik ka Mandya, Karnataka ki la rai ban pynkynriah noh ïa ki 22 ngut ki khynnah pule napoh ka Jylla sha ka Rehabilitation Centre ne Bala Mandir Center hapoh ka jingkhmih jong u Child Protection Officer (CPO) ynda la pyllait ïa ki na ‘hospital’.
Kum ban shu kdew hangne, kine ki khynnah ki la ngat ha ka jingjia suba ïoh bih na ka bam ha kawei ka jingjia kaba la jia ha Mandya distrik, Karnataka – kaba la ïalam sha ka jingkhlad noh jong 2 ngut ki khynnah napoh ka Jylla.
Ha kajuh ka por, kine ki ophisar na ki bor pynïaid distrik kin peit bniah ruh ïa ka rukom bam ka ban sa ai da u doktor.
Ïa kane ka rai la shim hadien ka jingïalang khmih bniah hapoh ka jingpyn-ïaid jong u Deputy Com-missioner ka Mandya ha ka Sngi Balang lem bad kiwei-kiwei ba kynthup ïa kito na ka tnad pule-puthi, Child Welfare Committee, kata u President bad ki Nodal Officer lem bad ki dkhot, Juvenile Justice President, District Backward Officer, Social Welfare Officer bad Hostel Nodal Officer, ki Executive Officer ka Zila Panchayat ne Chief Executive Officer ryngkat u Superintendent of Police ka distrik bad kiwei-kiwei ki ophisar.
Nalor kane, sa kawei ka jingmih na kane ka jingïalang ka long ba namarba une u bnai u dei ruh uba pynlong ïa ka eksamin kiew klas jong kine ki khynnah (ha la ki jong ki jong ki klas) bad kumta, ban ai lad ïa ki ban ïakhun ïa ka eksamin, kan long ka mat kaba hakhmat eh jong ki bor distrik ban khmih ba ki lah ban thoh beit ïa ki eksamin ha Bala Mandir Centre.
Na ka liang u Chairman ka Karnataka State Commission for Protection of Child Rights (KSCPCR) u la ïakren bad ka kynhun napoh ka Jylla bad hadien kane, ka la don ruh ka jingleit jurip lang ïa ka skul ha kaba la jia katei ka jingjia.
Hadien kane, u Chairman ka KSCPCR u la leit jngoh ïa ka ‘Hospital’ ha kaba kine ki khynnah ki la ïoh jingsumar ryngkat ka jingsynran lang u Deputy Commissioner ka Mandya bad kiwei-kiwei ki ophisar.
Kumba ka long, ka jinglong-jingman ha ka liang ka koit ka khiah jong ki khynnah napoh ka Jylla ka la sdang ban manbha lait noh tang uwei u khynnah uba dang don ha ICU, hynrei u don hapdeng ka jinglong-jingman kaba bit ba biang.
Hashuwa, ki ophisar ka Mandya distrik ki la mynjur ban aiti ïa ka kaiphod (ba la ai sha ka Sorkar Karnataka) sha ka kynhun napoh ka Jylla kumjuh halor ka kaiphod ba ïadei bad ka jingshah kem ha ryngkat ka ejahar, ka thup kyrteng jong ki khynnah kiba la ngat ha katei ka apot, ki nongmuna jong ka bam ba la dep peit bniah lem bad kiwei-kiwei ki jingtip.
