Jowai, Lber 20
Ka Government Girl’s Higher Secondary School, Jowai ha ka 20 tarik Lber ka la sdang ïa ka jingrakhe Golden Jubilee ne ka jingkynjoh sha u mawmer jong ka jingdap 50 snem ha ka jingïaid lynti ban ai ka jingshakri ha ka liang ka pule puthi hapoh ka District.
Ha kane ka sngi u MLA ka Jowai Ma Wailadmiki Shylla u la long kum kongsan ha ka jingdonlang ka symbud kongsan Kong AP Syiem Joint Director of School Education & Literacy bad In-charge DSEO West Jaiñtia Hills District.
Ïa ka jingïalang la pynlong ha madan Jrisalein Chutwakhu Jowai ha ka jingdonlang ruh ki nonghikai, ki kmie ki kpa, ki khynnah skul, ki pass pupils, nalor kiwei kiwei de kiba la shah khot sngewbha.
U Ma Wailadmiki Shylla ha ka jingkren u la kyntu ïa ki khynnah skul ban sngew ba ki long kiba donbok shibun bad ban pyndonkam ïa ka kabu jingpule namar ha kiwei pat ki bynta jong ka pyrthei ne wat ha ka ri India ruh ki don bun ki jaka kiba dang ïaleh ban ïoh ïa ka jingpule jong ki khynnah kynthei, hynrei hangne ngi rakhe ïa ka jingdap 50 snem jong ka Govt. Girl’s HSS.
U la pynpaw ka jingkmen ba wat hapdeng ki jingeh bapher bapher hynrei ki nongshong shnong ki shaniah ha ki jaka pule Sorkar, bad halor kane u la ai khublei kyrpang ïa baroh ki nonghikai kiba la aiti lut ïalade ban ai ïa ka jinghikai kaba bha ïa ki khynnah.
Haba ïadei bad ki jingeh hapoh ka tnat pule puthi, u MLA u la ong kam shym la long kaba suk ïa kane ka Sorkar namar ha ka por ba ka shimti ha ka bor ha u snem 2018 ka tnat pule puthi ka don ha ka jingeh namar lada nujor bad kiwei ki jylla jong ka thaiñ shatei lam-mihngi, ka Meghalaya ka don haduh 15 hajar tylli ki skul bad ka Sorkar ka shimkhia ban trei bha na bynta baroh ki skul.
U Ma Wailadmiki Shylla u la pynkynmaw ruh ha ka jingïalang ba ha ka dorbar mang tyngka kaba dang shu dep, u la kren halor ka jingbym treikam shuh ka hostel jong ka Govt. Girl’s HSS kaba long kaba donkam bha khamtam eh ïa ki khynnah kynthei kiba wan na ki jaka nongkyndong da kaba u pynthikna ruh ba ha kine ki sngi ban wan kane ka hostel kan treikam noh.
Shuh shuh u la pyntip ruh ba u la rah ïa ka mat hapoh ka ïingdorbar na ka bynta ban pynheh ïa ka Kiang Nangbah Government College bad mynta ka dang don ha ka jingpynkhreh bad u ngeit skhem ba ha ki sngi ban wan kan sa ïoh noh ïa ka jingmynjur.
U la kyntu ruh ïa ki khynnah kynthei kiba la pyndep ïa ka Eksam SSLC ban shim kabu ïa ka Chief Minister Scholarship Scheme kaba 8000 tyngka shisnem.
Nalorkata u la pyntip ruh ba u la dep ban ïakren bad CM bad la ïoh ruh ïa ka mang tyngka na ka bynta ban tei ïa ka Working Women’s Hostel hapoh ka District ha ka jaka ka MTC kaba don mar pyrshah bad ka Kiang Nangbah Government College.
Ka Kong AP Syiem Joint Director of School Education & Literacy bad In-charge DSEO West Jaintia Hills District ha ka jingkren ka la ong, ka Jubilee ka dei ka por jong ka jinglehkmen bad ka dei ruh ka por ban kynmaw ïa ki jingjop bad ki jingeh kiba ïakynduh lyngba ki 50 tylli ki snem kiba la leit noh bad mynta ka sngi ka dei ka sngi ban shim ïa ka rai kumno ban leh khambha shuh shuh lyngba ka jingïatreilang jong ki khynnah skul, ki kmie ki kpa bad kumjuh ruh ka shnong ka thaw hi baroh kawei.
Hashwa kane la ïoh ka jingkren pdiang na ka Vice Principal ka Kong Valency Lamare katba ka Principal ka Dr. Wa-i-sa Sumer kala kren halor ka histori jong ka jingïaid lynti jong ka skul naduh ba la seng ïa ka ha u snem 1975 kumjuh ka Dr. EA Paswet kaba Pass nyngkong eh ïa ka eksam SSLC ha kane ka skul.
Hashwa kane u Wailadmiki Shylla u la plie ïa ka building bathymmai jong ka Commerce Stream kaba u kyrmen skhem ba kan long ka jingkyrkhu ïa ka skul bad khamtam eh ïa ki khynnah skul.
La pynphuh pynphieng ïa ka jingrakhe da ki jingrwai bad ki jingshad na ki khynnah skul bad na ki pass pupil bad la sam ruh ïa ki jingai sngewbha sha baroh ki nonghikai barim.
