Shillong, Lber 20
Ka kynhun ki khynnah ïalehkai Under-17 jong ka Myngken Christian Hig-her Secondary School kaba na Bhoirymbong, Ri Bhoi District kan mih na kane ka nongbah ha ka Sngi U Blei ban leit mihkhmat ïa ka ri India sha ka Indo-French Foot-ball Tournament ka ban long ha Paris.
Kane ka kynhun ka dei kaba la wan ba-ar ha ka Under-17 Subroto Mukher -jee Football Cup kaba la long mynshem snem ha nongbah Delhi.
Te kumta kane ka kynhun ka la long ba la pynkhreh ïa ki jingkilanmet ha kane ka nongbah hapoh ka jingkhmih u coach Bah Bobby L Nongbet (AFC A Licence) bad uba long ruh u DSO ka Ri Bhoi District, kumjuh u Assistant Coach Bah Kitborlang Kharlukhi bad u Bah Carmelius Ramshon kum Manager.
Haba ïakren bad U Nongsaiñ Hima, u coach ka kynhun Bah Bobby u la pynpaw ba ka jingpynkhreh ka la ïaid mynta la katto katne por. Ïa katei ka lympung la pynkynriah haduh ar sien na ki daw bym lah kiar, hynrei kane ka la long ka jingailad ïa ngi ba ngin long kiba la khreh.”
“Kawei kaba sngewtynnad ka long ba ki khynnah ruh ki ïatrei shitom, te kumta nga khmih lynti ba baroh ki rangïalehkai kin lah ban ïalehkai bha ynda ki la poi sha ka Paris. Ki jingïalehkai kin sdang naduh ka 24 tarik mynta u bnai bad ngi lah ban ïakynduh ïa ki kynhun ïalehkai kiba na ki shlem ai jinghikai kiba don ha ka nongbah Paris kum ka Lyon, Torino bad kiwei kiwei,” u la bynrap.
Ym tang ban shu ïalehkai phutbol ha katei ka ri, hynrei kitei ki khynnah kiba wan na ki longïing na ki shnong na nongkyndong ki donkam ruh ban ïoh ka jingshah hikai ha ka rukom bam (table manners) bad wat ha ka thiah ka dem. “Ngi sngewkmen ba na ka liang ka tnat ïalehkai ka Sorkar Jylla ka la ïatrei lang bad ka Centre Point lyngba ka Shillong Lajong Football Club na ka bynta ban ai jinghikai ïa ki khynnah ha ka rukom bam halor miej khnang ba kan long kaba i donburom haba ki don ha ki jaka bam ha Paris bad wat haduh ki jaka thiah,” la bynrap u Bah Nongbet.
Kumjuh, u Bah Kitborlang Kharlukhi u la pynpaw ba ka jingpynkynriah ïa katei ka lympung ka long ka jingïarap na ka bynta ban pynbit pynbiang ïa baroh ki jingdonkam na ka bynta ki khynnah. “Ha kane ka sien kaba khatduh ngi la ïoh ban pynkhreh ïa ki jingkilanmet na ka bynta ka kynhun kumba 10 lane 11 sngi. Te kumta ngi khmih lynti ba kine ki khynnah kin lah ban ïalehkai bha ha Paris.”
Ha kawei pat ka liang, ar ngut ki khynnah ïalehkai kita u Samepaïa Thangkhiew (goalkeeper) bad u Mebankhraw Nongrum (left wing) ki la pynpaw ka jingai khublei ïa ka tnat ïalehkai bad kumjuh ïa ka skul ba ki la mihkhmat namar ki jingkyrshan bad jingai mynsiem jong ki. Te kumta ki la pynpaw ba kum ka kynhun ki la khmih lynti ban ïalehkai ha katei ka lympung.
