Shillong, Lber 20
Ka Hynñiewtrep Youths’ Council (HYC) ha ka Sngi Palei ka la dawa na ka Sorkar Jylla ban phah tohkit da ka Fact Finding Team ïa ka jingdon ki khynnah shynrang bad kynthei ka Jylla, kiba la shah ïalam ha ki kynhun ban ïoh leit skul ei shabar ka Jylla.
Kane ka jingdawa jong ka HYC ka la mih hadien ka jingjia ba ki khynnah skul ki la ïoh da ka bam kaba la sniew ha Jylla Karnataka, ha kaba 2 ngut ki khynnah skul na Meghalaya ki la duh noh ïa la ka jingim.
Ha ka shithi kaba la phah sha u Myntri Rangbah ka Jylla, Conrad K Sangma, ka HYC ka la pynpaw ba ka jingïap jong 2 ngut ki khynnah ka dei namar ka jingïoh ïa ka bam kaba la sniew ha ka skul kaba don ha ka Jylla Karnataka bad la pynkit sha jaka sumar ïa bun ngut kiwei pat kiba la kem pang kiba dei na kajuh ka skul. Ka seng ka la ong ba kane ka jingjia ka dei kaba hap ban shimkhia bha da ka Sorkar Jylla bad kito kiba don kti ki dei ban shah pynshitom bad ban shah leh da kaba tyngeh katkum ki kyndon aiñ.
“Ka long kaba donkam kyrkieh ban don da ka jingtohkit kaba bniah da ka Fact Finding Team jong ka Jylla, ban lap ïa ka jingdon ki khynnah shynrang bad kynthei kiba la shah ïalam ha ka kynhun ne ki seng ban leit skul ei shabar ka Jylla”, la pynpaw ka HYC ha ka shithi ba la soi da u President, Bah Roykupar Synrem ïa kaba la phah sha u Myntri Rangbah.
Ha ka shithi ka seng ka la ban jur ïa ka Sorkar ba ka dei ban lum ïa ki kyrteng jong ki kynhun ne ki seng ryngkat bad ki nongkitkam jong kita ki kynhun lem bad ki phone number, kiba shim ïa ka jingkitkhlieh ban ïalam ïa ki khynnah sha ki skul shabar Jylla, nalor ban shim ruh ïa ka kyrteng bad ki jingtip kiba bniah jong ki khynnah kiba la shah ïalam ha kitei ki kynhun ne ki seng. Shuh shuh, ka HYC ka la kyntu ruh ïa ka Sorkar ba kan lum ïa ki kyrteng bad ki jingtip jong ki jaka pule kiba kitei ki khynnah ki leit, ka jingtip shaphang ka jaka, jaka sah ba la buh ïa ki khynnah bad ka jingbuddien ban pynthikna ïa ka jingshngaiñ jong ki khynnah kiba na ka Jylla kiba leit pule bad sah ha ki jaka pule kiba don shabar.
Ka HYC ka la pynpaw ruh ba ka long kaba donkam ban pynthikna ba ka jingim jong ki khynnah ym dei ban shu duh noh ha ka jingjia kaba ym lah ban poi pyrkhat bad dei ban don ïa ka rukom treikam ka ban pynshitom ïa ki briew kiba la shim ïa ka jingkitkhlieh na ka bynta ka jingshngaiñ bad ka bha ka miat jong ki khynnah pule.
Ka HYC ka la ban jur ruh ïa ka jingdonkam ba ka Sorkar kan shim khia ïa ka kaiphot jingtohkit jong ka Sanjana Chappali ka ‘TEHELKA’ kaba la jer kyrteng ‘A Strange And Bitter Crop’ kaba la pynmih ha u snem 2009 bad kaba la batai ïa ki jingshisha halor ka jinglong jingman jong ki khynnah kiba la ïalam da ka seng RSS bad ki kynhun kiba ïatreilang bad ka sha Karnataka.
Ka HYC ka la kdew ba katkum ka kaiphot, ki don palat 1000 ngut ki khynnah na kylleng ki district jong ka Jylla kiba la ïoh leit skul ei ha kylleng ki bynta jong ka ri India na katei kajuh ka seng, namarkata ka dei ban buh hakhmat eh ïa ka jingshngaiñ bad ka bha ka miat jong ki khynnah.
Na ka liang ka HYC ka la kyrpad ruh ïa ka Sorkar ba kan shim khia bad pynthikna ïa ka jingwanphai ba ka dei ban long kaba shngaiñ, lada don ki kmie ki kpa ne ki bahaïing bahasem jong ki khynnah kiba kwah ban wan ïalam noh ïa la ki khun sha la ïing, ki bym lah ban leh ïa kata namar ba ki don hapdeng ka jingkyrduh pisa.
