Guwahati, Lber:
Ka ïingbishar ha Sonitpur distrik, Assam, ka la kyntait ban ai jamin ïa u Mahbubul Hoque, Chancellor jong ka University of Science and Technology Meghalaya (USTM), ha kaba ïadei bad ka mukotduma halor ka jingkynnoh ba u la leh bymhok ha ka por ba don ki eksam. Ka Sonitpur Judicial Magistrate First Class, ka Hriday Jyoti Kashyap, ka la kyntait ïa ka jingkyrpad jamin jong u Hoque, hadien ba ka la sngap ïa ki jingkynthoh na baroh arliang kiba mudui bad kiba kyrshan.
U Hoque, uba la wan mih lyngba ka jingïakren ha ka durkhih na Tezpur Central Jail, u shah pynngat ha ki kyndon kiba bun ki bym lah ban ai jamin, hadien ka jingujor kaba la mudui ha Dhekiajuli. Katkum ka jingong jong u nongïasaid aiñ jong ka sorkar u Munin Barua, ki pulit ki la buh jingmudui ïa kane ka mukotduma hadien ba ki la ïoh ïa ka jingkynnoh ba u Hoque u la kular ïa ki samla pule ban pyndonkam ïa ki lad ki lynti ki bym hok ban ïarap ïa ki ban ïoh ïa ki mark kiba heh ha ki eksamin.
Kane ka mukotduma ka dei shi bynta jong ka jingtohkit halor ki jingjia kiba kum kine ha kylleng ka Assam. Wat la ka Gauhati High Court kham mynshwa ka la ai jamin ïa u Hoque ha ki ar tylli ki mukotduma ba kyrpang ha Sribhumi distrik hynrei la kem biang ïa u da ki pulit ka Sonitpur ha kaba ïadei bad kane ka mukotduma kaba thymmai.
Ha u bnai Rymphang, u Hoque bad san ngut ki nonghikai na ka ERD Foundation jong u, kaba pynïaid ïa ki katto katne ki jaka pule, ki la shah kem hadien ba la mih ki jingkynnoh ba ki khynnah skul na kiwei pat ki distrik ki shah ban ïakhun ïa ki eksamin Class 12 CBSE ryngkat bad ki jingpynthikna ba kin pyndonkam da ki lad ki lynti bym hok.
U Myntri Rangbah ka Assam u Himanta Biswa Sarma u la kynnoh ba u Hoque u donkti ha ki kam thok bad pynpaw ruh ba un sah ha phatok kham slem. U Sarma u la pynïadei ruh ïa u Hoque bad ka jingïakajia kaba la jia mynshwa halor ka jinglehthok ban shim ïa ka OBC Certificate bad u la kynthoh ïa ka USTM halor ka jingkynnoh ba kam pyntreikam hok ban sam ïa ki jingïarap halor ka jingshlei um ha Guwahati.
