Guwahati, Lber:
Ka sorkar pdeng ka la mynjur da T. 100 klur na ka bynta ban tei ïa ka skul Sainik bathymmai ha Langvoku ha Karbi Anglong jong ka Assam. Ka tnat ïada ri ka la pyllait ïa ka song pisa kaba T. 100 klur kum ka jingkyrshan na ka bynta ka jingtei ïa kane ïingskul na ka bynta u snem ka kheiñ ka diah jong u 2024-25.
Haba phai sha ki lad phah khubor, u Myntri ka tnat pule-puthi ka Assam u Ranoj Pega u la thoh, “Ka jingsngewnguh kaba khraw ïa ka tnat ïada ri kaba la mang ïa ka pisa kaba T. 100 klur na ka bynta ban tei ïa ka Skul Sainik ha Langvoku, Karbi Anglong.”
U la ong, “Kane kan kyntiew shibun ïa ka jingpule kaba bha bad ka jinglong ryntih hapdeng ki samla pule jong ngi. Ka jingkhublei kaba kyrpang ïa u Myntri ka tnat ba dei khmih Rajnathsingh na ka bynta ka jingkyrshan ïa kane ka pisa ba la pyllait na ka jingmang pisa baroh kaba T. 335.87 klur.”
U Deputy Speaker jong ka Ïingdorbar Thawaiñ jong ka Assam, u Numal Momin, u la pynpaw ruh ïa ka jingsngewnguh ïa ka sorkar pdeng kaba la mynjur ïa ka pisa na ka bynta ban tei ïa ka skul Sainik.
U la ong ba kane ka jaka pule kan saiñdur ïa ka lawei jong ki samla ka Assam da kaba pynrung ïa ka jinglong ryntih, ki jinglong nongïalam, bad ka jingsngew ba jylliew ban shakri ïa ka ri.
