Shillong, Lber 20
U Bah P.T Sawkmie, MLA barim ka Mawlai u la plie ïa ka madan basketball jong ka Stephen Memorial Secondary School kaba don ha Mawlai Mawroh ryngkat ki nongpynïaid skul, ki nongkitkam shnong Mawlai Mawroh, ki khynnah skul bad kiwei kiwei.
Ha kane ka sngi u Bah Sawkmie u la pynbna ruh ba la plie ïa ka lympung ïalehkai ki khynnah jong katei ka skul kaba la ju pynlong shisien shi snem ne ka Annual School Sports Meet 2025 ha ka 11 tarik mynta u bnai.
Shuwa ban plie ïa ka madan bad ïa ka School Sports, ka la don ka jingïakob March Pass da saw tylli ki house, kita ka Green, Blue, Yellow bad ka Red House. Ki la don ruh ki drill ba la shim bynta da ki khynnah jong kane ka skul.
Haba kren ha kane ka sngi u Bah Sawkmie u la kyntu ïa ki khynnah ba barabor ki dei ban mih shakhmat ban ïashim bynta ha ki jingïalehkai ba ka skul ka pynlong khnang ba kan kyntiew ïa ki ha ki liang baroh.
Katba na ka liang ka Headmistress jong ka skul ka la pynpaw ïa ka jingsngewnguh halor kane ka jingai jong u Bah Sawkmie ïa ka madan basketball lyngba ka MLA skhim kaba u la ai ha ka por ba dang long kum MLA.
