Shillong, Lber 20
U Myntri ka tnat ïalehkai ka Sorkar Pdeng, Dr. Mansukh Mandaviya u la plie ïa ka 2nd Khelo India Para Games 2025 ha ka Sngi Palei ha KD Jadhav Indoor Hall, Indira Gandhi Stadium kaba ha nongbah Delhi. Ha kane ka lympung la wan shim bynta kumba 1300 ngut ki nongïalehkai (para athletes) ha hynriew tylli ki jingïalehkai ka ban neh haduh phra sngi kynthih.
Nalor utei u kongsan, la ïadon lang ha katei ka sngi plie da ki hynriew ngut ki nongïalehkai (paralympian) kita ka Simran Sharma (athletics), Praveen Kumar (badminton), Nitesh Kumar (badminton), Nitya Sre (badminton) bad ka Preeti Pal (athletics) ryngtat u Dr. Virendra Kumar, Myntri ka tnat Social Justice & Empowerment, u Kento Jini, Myntri ka tnat ïalehkai jong ka Arunachal Pradesh bad u President ka Paralympic Committee of India bad uba long ruh u nongïalehkai (paralympian) u Devendra Jhajharia.
Haba ai jingkren ha kane ka sngi, u Dr. Mansukh u la pynpaw ïa ka jingkmen ban ïohi ïa ka jingpynpaw ïa man la ki jingïalehkai Khelo India kaba mynta ka la kylla long kum ka “shatri” na ka bynta baroh ki nongïalehkai kiba angnud ban jop ïa ki nam na ka bynta ka ri. “Nga sngewsarong bad sngewkmen haduh katta katta ïa ki jingnoh synñiang ba la noh da ka Khelo India sha ki jingïalehkai ha ka ri. La ka long ka Khelo India Youth Games, ka Khelo India School Games, ka Khelo India Winter Games lane ka Khelo India Para Games, ki nongïalehkai jong ngi ki pynsarong ïa ka ri lyngba ki sap jong ki ha manla ki jaka”, u la bynrap.
Ha kawei pat ka liang u Dr. Kumar u la ïaroh ruh ïa ka jingthmu jong ka Khelo India bad u la kdew, “Ka Khelo India Para Games 2025 ka dei ka rynsan kaba paw ha ka pyrthei na ka bynta ki nongïalehkai ka ri India ban ïakhun hapdeng jong ki bad ban pynpaw paidbah ïa ki sap jong ki.
Ha kane ka lympung ka ban kut haka 27 tarik mynta u bnai, ki don tylli ki jingïalehkai kata ka para athletics, para archery, para powerlifting, para badminton, para table tennis bad ka para shooting.
