Shillong, Lber 20
Ka kynhun ki rangïalehkai phutbol ka Bangladesh ka la wan poi ha ka nongbah Shillong ha ka Sngi Palei na ka bynta ban pynkhreh ïa ka jingïakhun wat ba nyngkong jong ka AFC Asian Cup 2027 Qualifier pyrshah ïa ka India.
Kane ka jingïakhun kan long ha ka 25 tarik mynta u bnai ha Jawaharlal Nehru Stadium, Shillong ha ka por 7 baje janmiet.
Ha kane ka jingwan ïuhkjat ha kane ka nongbah, la sakhi ïa ka jingwan lang u rangïalehkai ka English Premier League, u Hamza Dewan Choudhury u ban mihkhmat ïa katei ka ri ha ka sien kaba nyngkong eh bad la pdiang burom ïa kane ka kynhun da ki dkhot nongkitkam ka Meghalaya Football Association.
U Hamza uba dei u rangïalehkai ka Leicester City, la shim wai da ka Sheffield United kaba shim bynta ha ka EFL Championship ha England.
Haba ïadei bad ka jingïalehkai pyrshah ïa ka India, na ka liang u Hamza u la pynpaw ha ki lad pathai khubor ba kan long ka jingïakhun kaba itynnad bad u la pynpaw ruh ïa ka jingkhmih lynti ban ïoh ïa ka jingjop na ka bynta ka Bangladesh.
Ha ka lympung AFC Asian Cup 2027 Qualifier ka India bad ka Bangladesh ki la don ha ka Group-C kiba kynthup lang ïa ka Hong Kong-China bad ka Singapore.
Lah ban kdew, u Hamza uba la mihkhmat ruh ïa ka kynhun Under-21 jong ka England ha u snem 2018-19, u la shah khot sngewbha ha ka Bangladesh ban mihkhmat ïa kane ka ri ha ka sien kaba nyngkong eh ha katei ka lympung.
