Nongpoh, Lber 20
Ka jingtrei torti ïa ki surok da katto-katne ki kontraktor kam dei shuh ka kam kaba dang thymmai, hynrei kaba ïai jia bad lap na ka por sha ka por. Kawei na kine ki jingtrei ka dei kaba la lap da ka Hynñiewtrep Youth Council (HYC) Raid Thadrang Circle halor ka jingpyntrei ïa ka surok Pradhan Mantri Gram Sadak Yojana (PMGSY) na Kyrdem sha Khyndewso.
Katkum ka jinglap jong ka seng, ïa kane ka surok kaba don ïa ka jingjrong kaba 10 kilometre, la sakhi lyngba ki durkhih ba ïa ka jingpyntrei ïa ka surok la shu leh torti da u kontraktor ha kaba wat ïa ka surok kaba la dep ban siang rong, la lah ban shu khlong da ki kti.
Ki nongïalam ka HYC Raid Thadrang Circle ba kynthup ïa u samla Pyndap Masharing, General Secretary ha ka jingdonlang u samla Shemphang Masharing, General Secretary ka HYC Ri Bhoi District, ki la pynpaw ïa ka jingsngewkhia jur halor kane ka jingpyntrei torti ïa ka surok kaba la mang kyrpang da ka Sorkar na ka bynta ka jingmyntoi jong ki paidbah ka thaiñ.
Kitei ki nongïalam ka HYC, ki la ong ruh ba katkum ka jingujor jong ki paidbah, kiba bun ki bynta jong katei ka surok, ka la jot noh wat tang shi taïew hadien ba la dep siang rong. Kumta na ka liang ka seng ha ka step Sngi Palei ki la leit hi ban jurip bad lap dalade ïa ka jingtrei torti ïa katei ka surok da kaba kynthoh ba ka jingsiang rong ïa ka surok ka long kumba siang ‘carpet’ kaba lah ban shu khlong tang da ki kti.
Halor kane ka jingpyntrei torti ïa kane ka surok, ki nongïalam ka seng ki la dawa ïa u kontraktor ba u dei ban shna pynbha biang ïa katei ka surok mardor bad dawa ruh ïa ka tnat PWD ba ka dei ban shimkhia ban hukum ïa u kontraktor ba u dei ban pyntrei ïa katei ka surok katkum ki rukom ba la buh khnang ba kan long ka jingmyntoi ïa ki paidbah. Nangta ka la maham ruh ba lada u kontraktor bad ka tnat PWD kim leh eiei, na ka liang jong ki kim banse ban shim da kiwei pat ki sienjam ba tyngeh.
