Shillong, Lber 21
Ka Meghalaya State Kickboxing Association (MSKA) ha ka Sngi Palei 20 tarik u Lber 2025 ka la pdiang sngewbha ïa ki 11 ngut nongïalehkai na ka Team Revolution kiba la wanphai na West Bengal, hadien ba ki la ïalehkai bha ha ka Pro National Open Kickboxing India League. Kane ka jingïakob kaba la long naduh ka 17 haduh 19 tarik u Lber, 2025, ha City Centre Mall ha Siliguri, West Bengal ba la pynlong da ka Foundation of Kickboxing India League West Bengal lyngba ka jingkyrshan ka Wako India Kickboxing Federation.
Ki don lai ngut ki nongïalehkai na ka jylla Meghalaya kiba la jop da kaba khur ïa ka Title Belt ryngkat ka song pisa kaba T.15,000. Kine ki long ka Daniella I Wanda Mylliemngap, u Juh Pa U Juh Nongtdu bad u Fedrick Khongsit. Katba ka Careen Judy Kharkamni bad ka Ibankyntiew Iangrai ki la khur ïa ki khusnam na ka bynta ka jingtbit jong ki ha ka jingïalehkai.
Haba kren sha ki lad pathai khubor, ki nongïalehkai ki la pynpaw ïa ka jingsngew sarong ban mihkhmat ïa ka jylla ha kum kane ka rynsan bad ki la pynpaw ïa la ka jingangnud ban ïoh shuh-shuh ïa ka jingjop ha ki jingïakob ban wan, khamtam ha ki jingïalehkai ha kylleng ka pyrthei. Ki la pynpaw ruh ïa ka jingsngewnguh ïa ka Team Revolution halor ka jingpdiang sngewbha ba ki la ïoh.
